మెటాలో 8 వేల మందిపై వేటు.. మరో 7 వేల మంది ఉద్యోగ విధులు, బాధ్యతల్లో మార్పు

ఫేస్‌బుక్‌ మాతృ సంస్థ మెటా భారీ ఉద్యోగాల కోతకు సిద్ధమవుతున్నది. మే 20న సంస్థలోని సుమారు 8 వేల మందికి పైగా ఉద్యోగులను విధుల నుంచి తొలగించనుంది. ఇది ప్రపంచ వ్యాప్తంగా మొత్తం ఉద్యోగుల సంఖ్యలో 10 శాతంగా అంచనా వేస్తున్నారు.

• స్టాండర్డ్‌ చార్టెర్డ్‌ కంపెనీలో 7800 మందికి ఉద్వాసన

వాషింగ్టన్‌, మే 19 : ఫేస్‌బుక్‌ మాతృ సంస్థ మెటా భారీ ఉద్యోగాల కోతకు సిద్ధమవుతున్నది. మే 20న సంస్థలోని సుమారు 8 వేల మందికి పైగా ఉద్యోగులను విధుల నుంచి తొలగించనుంది. ఇది ప్రపంచ వ్యాప్తంగా మొత్తం ఉద్యోగుల సంఖ్యలో 10 శాతంగా అంచనా వేస్తున్నారు. ఉద్యోగుల తొలగింపుతో పాటు సుమారు 7 వేల మంది ఉద్యోగులను కొత్తగా పునర్‌ వ్యవస్థీకరించిన కృత్రిమ మేధపై దృష్టి సారించే బృందాల ఏర్పాటుకు తరలించనున్నారు. ప్రస్తుతం 78,000 మందికి కాస్త తక్కువగా ఉన్న మెటా ఉద్యోగుల సంఖ్యలో ఈ మార్పుల ప్రభావానికి గురైన వారి సంఖ్య దాదాపు 20 శాతానికి చేరుకుంది. రాయిటర్స్‌ వార్తా సంస్థ కథనం ప్రకారం సంస్థలో ఉద్యోగుల తొలగింపుతో పాటు సంస్థ పునర్‌ నిర్మాణంలో భాగంగా చేపట్టబోయే చర్యలు, ఉద్యోగుల బదిలీ గురించి సోమవారం ఒక అంతర్గత మెమోలో ఉద్యోగులకు తెలియజేసింది. ఈ నెల 20న మూడు వేర్వేరు దశలలో ఈ-మెయిల్స్‌ ఉదయం 4 గంటలకు వస్తాయని కంపెనీ వర్గాలు తెలిపాయి.

స్టాండర్డ్‌ చార్టెర్డ్‌లోనూ..

యూకే ప్రధాన కేంద్రంగా ఉన్న అంతర్జాతీయ బ్యాంక్‌ స్టాండర్డ్‌ చార్టెర్డ్‌ 2030 నాటికి సుమారు 7,800 మంది ఉద్యోగులను తొలగించాలని లక్ష్యంగా పెట్టుకున్నట్టు ప్రకటించింది. ఇది మొత్తం ఉద్యోగుల సంఖ్యలో 15 శాతం. ప్రపంచ వ్యాప్తంగా ఈ సంస్థకు 82 వేల మంది ఉద్యోగులుండగా, వారిలో 52 వేల మందికి పైగా లక్ష్యంగా చేసుకున్న కార్పొరేట్‌ విభాగాల్లో ఉన్నారు. ఆసియాపై దృష్టిసారించిన స్టాండర్డ్‌ చార్టర్డ్‌, తన బ్యాక్‌ ఆఫీస్‌ను కుదించుకోవడానికి ఏఐపై ఆధారపడటంతో ఈ ఉద్యోగులను తొలగించనుంది.