కుక్క కోసం బస్సు ఆపిన డ్రైవర్‌.. వీడియో వైరల్‌

బ్యాంకాక్: ఇంటి నుంచి తప్పిపోయి రద్దీ రోడ్డుపై చిక్కుకున్న కుక్కను గమనించిన డ్రైవర్‌ బస్సును ఆపి దానిని రక్షించాడు. దీంతో అది బస్సు ఎక్కి సీటు కింద కూర్చొంది. చివరకు తన యజమానిని చేరుకున్నది. థాయిలాండ్‌ రాజధాని బ్యాంకాక్‌లో ఈ ఘటన జరిగింది. కుకీ అనే పేరున్న పెంపుడు కుక్క ఇటీవల నిర్మాణ స్థలం నుంచి దారి తప్పింది. మూడు రోజులుగా ఆహారం లేక ఆకలితో అలమటిస్తున్నది. రద్దీగా ఉన్న రహదారిపై మధ్యలో అది చిక్కుకున్నది. ఎన్‌ 166 అనే బస్సు ఆ కుక్క పక్కగా వెళ్తుండగా మెల్లగా వెళ్లాలని, దాని వల్ల ప్రమాదం వాటిల్లే ముప్పు ఉన్నదని డ్రవర్‌ తుయెన్ ప్రతుమ్‌తోంగ్‌కు రేడియో ద్వారా అనౌన్స్‌మెంట్‌ వినిపించింది.

కాగా, ఆ బస్సు డ్రైవర్‌ ఆ కుక్కను కాపాడేందుకు ఏదో ఒకటి చేయాలనుకున్నాడు. కండక్టర్‌ కూడా ప్రయాణికుల అభిప్రాయాన్ని తెలుసుకున్నాడు. ఎవరూ అభ్యంతరం వ్యక్తం చేయకపోవడంతో డ్రైవర్‌ బస్సును ఆపాడు. దీంతో కండక్టర్‌ పిలుపుతో ఆ కుక్క బస్సులోకి ఎక్కింది. ఎవరికీ ఇబ్బంది కలిగించకుండా ఒక సీటు కింద కూర్చొంది. బస్సు డిపోకు చేరగా దానికి ఆహారం, నీరు అందించారు.

మరోవైపు ఈ విషయం తెలుసుకున్న కుక్క యాజమాని డిపోకు వచ్చి తప్పిపోయిన దానిని తీసుకున్నారు. బస్‌ సిబ్బందికి ఐదు వేల నగదు ఇచ్చారు. నిరాకరించిన సిబ్బంది ఆ డబ్బును జంతు సంరక్షణ కేంద్రానికి విరాళంగా ఇచ్చారు. కాగా, ఆ కుక్క బస్సులోకి ఎక్కిన వీడియో సామాజిక మాధ్యమాల్లో వైరల్‌ అయ్యింది. దానిని కాపాడిన బస్సు డ్రైవర్‌, కండక్టర్‌ చొరవను నెటిజన్లు ప్రశంసించారు.