Darlyn Morais | సాలీడు కాటుకు ప్రముఖ సింగర్‌ మృతి..!

Darlyn Morais | సాలీడు కాటుకు ప్రముఖ గాయకుడు ప్రాణాలు కోల్పోయాడు. బ్రెజిల్‌ దేశంలో ఈ విషాద ఘటన చోటుచేసుకుంది. బ్రెజిల్‌కు చెందిన ప్రముఖ సింగర్ డార్లిన్ మోరైస్ ( Darlyn Morais) ఇటీవల సాలీడు కాటేసింది. దాంతో తీవ్ర అనారోగ్యానికి గురైన మోరైస్‌ ఆస్పత్రిలో చికిత్స పొందుతూ చివరికి ప్రాణాలు విడిచాడు.

బ్రసీలియా: సాలీడు కాటుకు ప్రముఖ గాయకుడు ప్రాణాలు కోల్పోయాడు. బ్రెజిల్‌ దేశంలో ఈ విషాద ఘటన చోటుచేసుకుంది. బ్రెజిల్‌కు చెందిన ప్రముఖ సింగర్ డార్లిన్ మోరైస్ ( Darlyn Morais) ఇటీవల సాలీడు కాటేసింది. దాంతో తీవ్ర అనారోగ్యానికి గురైన మోరైస్‌ ఆస్పత్రిలో చికిత్స పొందుతూ చివరికి ప్రాణాలు విడిచాడు. మోరైస్‌ తన ముఖంపై సాలీడు కుట్టడంతో చనిపోయాడని అతని భార్య జులినీ లిస్బోవా (Jhullenny Lisboa) తెలిపింది.

మోరైస్ భార్య జులినీ లిస్బోవా వెల్లడించిన వివరాల ప్రకారం.. సాలీడు కుట్టిన వెంటనే మోరైస్‌ శరీరంలో నిస్సత్తువ ఆవహించింది. ఆ తర్వాత ముఖం ఉబ్బిపోయింది. గాయం కూడా నల్లగా మారిపోయి అలర్జీ వచ్చింది. దాంతో అతడిని వెంటనే ఆస్పత్రికి తరలించారు. చికిత్స అనంతరం ఈనెల 3న ఆస్పత్రి నుంచి డిశ్చార్జి చేశారు. కానీ మోరైస్ పరిస్థితి మెరుగు కాకపోవడంతో తిరిగి ఆదివారం పల్మాస్ జనరల్ ఆస్పత్రికి తరలించారు. మోరైస్‌ను కాపాడేందుకు వైద్యులు చేసిన ప్రయత్నాలు సఫలం కాకపోవడంతో మృతిచెందాడు.

మోరైస్ సవతి కూతురు (18) ని కూడా సాలీడు కుట్టిందని, అయితే ఆమె ఆరోగ్య పరిస్థితి ప్రస్తుతం నిలకడగా ఉందని జులినీ తెలిపింది. దీనిపై మోరైస్‌ కుటుంబం ఇన్‌స్టాలో ఒక పోస్ట్‌ పెట్టింది. ఈ కష్ట సమయంలో తమకు అండగా నిలిచిన ప్రతీ ఒక్కరికీ కృతజ్ఞతలు తెలిపింది. కాగా, మోరైస్‌ 15 ఏండ్ల వయస్సులో తన సంగీత వృత్తిని ప్రారంభించాడు. తనదైన స్టయిల్‌తో ఒక బ్యాండ్‌ను ఏర్పాటు చేసుకున్నాడు. సోదరుడు ,స్నేహితుడితో కూడిన ముగ్గురు సభ్యుల బ్యాండ్‌.. టోకాంటిన్స్, గోయాస్, మారన్‌హావో, పారా రాష్ట్రాల్లో విస్తృతమైన ప్రదర్శనలతో ఆకట్టుకున్నది.

కాగా మోరైస్‌ ఎప్పుడూ సంతోషంగా నవ్వుతూ నవ్విస్తూ ఉండే వాడని, నలుగురికి సాయం చేసే వాడని అతని సమీప బంధువు వెస్లెయా సిల్వా కన్నీరు పెట్టుకున్నారు. మోరైస్ ప్రతిభను గుర్తు చేసుకుంటూ సహచర గాయకుడికి ఆయన స్నేహితులు నివాళులు అర్పించారు. కాగా, డార్లిన్ మోరైస్ మరణానికి గల కారణాలను దర్యాప్తు చేస్తున్నామని బ్రెజిల్‌ స్టేట్ డిపార్ట్‌మెంట్ ఆఫ్ హెల్త్ తెలిపింది.