Visit:
వాషింగ్టన్, ఏప్రిల్ 27 : వైట్హౌస్ కరస్పాండెంట్స్ డిన్నర్లో కాల్పుల ఘటన నిందితుడు కోల్ టొమాస్ అలెన్ గురించి కొత్త విషయం వెలుగుచూసింది. అతడు అధ్యక్షుడు ట్రంప్నకు వ్యతిరేకంగా దాడికి దిగేముందు ఒక నోట్ను తయారుచేసుకొని, దానిని కుటుంబ సభ్యులకు పంపాడు. పిల్లలను లైంగికంగా వేధించే వ్యక్తి, రేపిస్ట్, ద్రోహి వంటి పదాలను అందులో వాడాడని, ట్రంప్ను ఉద్దేశించి అలెన్ ఈ వ్యాఖ్యలు చేశాడని అంతర్జాతీయ మీడియాలో వార్తా కథనాలు వెలువడ్డాయి.
‘అలాంటి లక్షణాలున్న వ్యక్తిని ఏమాత్రం అంగీకరించను’ అని ఆ నోట్లో నిందితుడు రాసుకున్నాడు. అలాగే తాను ఎవరిని టార్గెట్ చేయాలనుకున్నాడో ఒక జాబితాను కూడా సిద్ధం చేసుకున్నాడు. తన జోలికి రానంతవరకు అతిథులు, ఇతర సిబ్బంది, సీక్రెట్ సర్వీస్ ఏజెంట్లపైనా కాల్పులు జరపనని పేర్కొన్నాడు. అలాగే హోటల్ భద్రత ఘోరంగా ఉందని, తాను భారీ రైఫిల్ను తెచ్చినా ఎవరూ గుర్తించేవారు కాదంటూ నిందితుడు వ్యాఖ్యానించాడు.
