స్వయం ఉపాధితో..మహిళలు ఆర్థికంగా ఎదగాలి

మహిళలు కుట్టు శిక్షణతో స్వయం ఉపాధిని పొందటంతోపాటు ఆర్థిక స్వావలంబన సాధించవచ్చని మలక్‌పేట ఎమ్మెల్యే అహ్మద్‌ బిన్‌ అబ్దుల్లా బలాల అన్నారు. మంగళవారం పాత మలక్‌పేట డివిజన్‌లోని పద్మానగర్‌లో ఏర్పాటు చేసిన సాలార్‌ యే మిల్లత్‌ ఉచిత కుట్టు శిక్షణ కేంద్రాన్ని ఆయన ప్రారంభించారు.

• మలక్‌పేట ఎమ్మెల్యే అహ్మద్‌ బిన్‌ అబ్దుల్లా బలాల
• పాత మలక్‌పేటలో సాలార్‌ యే మిల్లత్‌
• ఉచిత కుట్టు శిక్షణ కేంద్రం ప్రారంభం

మలక్‌పేట, డిసెంబర్‌ 12: మహిళలు కుట్టు శిక్షణతో స్వయం ఉపాధిని పొందటంతోపాటు ఆర్థిక స్వావలంబన సాధించవచ్చని మలక్‌పేట ఎమ్మెల్యే అహ్మద్‌ బిన్‌ అబ్దుల్లా బలాల అన్నారు. మంగళవారం పాత మలక్‌పేట డివిజన్‌లోని పద్మానగర్‌లో ఏర్పాటు చేసిన సాలార్‌ యే మిల్లత్‌ ఉచిత కుట్టు శిక్షణ కేంద్రాన్ని ఆయన ప్రారంభించారు. ఈ సందర్భంగా ఎమ్మెల్యే మాట్లాడుతూ.. మహిళలు కుటుంబాన్ని చక్కబెట్టుకుంటూనే కుట్టు శిక్షణతో స్వయం ఉపాధిని ఇంటి నుంచే పొందవచ్చన్నారు. మహిళలు కుటుంబ పోషణలో పురుషులకు చేదోడు వాదోడుగా నిలవడంతో కుటుంబ పోషణ భారం తగ్గుతుందని, కుటుంబాలు త్వరగా ఆర్థికంగా నిలదొక్కుకుంటాయని తెలిపారు.

మహిళలకు స్వయం ఉపాధి కల్పించేందుకు ఎంఐఎం పార్టీ సాలార్‌ యే మిల్లత్‌ ఉచిత కుట్టు శిక్షణ కేంద్రాలను ఏర్పాటు చేసిందని చెప్పారు. ఇందులో ఉచిత శిక్షణతోపాటు కుట్టు మిషన్లను కూడా అందించనున్నట్లు పేర్కొన్నారు. ప్రజలు ఈ అవకాశాన్ని సద్వినియోగం చేసుకోవాలని సూచించారు. ఈ కార్యక్రమంలో పాత మలక్‌పేట డివిజన్‌ ఎంఐఎం అధ్యక్షుడు షఫీ, డివిజన్‌ నాయకులు, స్థానిక మహిళలు పాల్గొన్నారు.