స్కానింగ్‌ సేవలకు మంగళం!

బీఆర్‌ఎస్‌ ప్రభుత్వం ప్రతిష్టాత్మకంగా ప్రారంభించిన తెలంగాణ డయాగ్నోసిక్స్‌ సెంటర్లలోని స్కానింగ్‌ కేంద్రాలు, రేడియాలజిస్టు వైద్యులు లేక రోగులు ఇబ్బందులకు గురవుతున్నారు.

• టీ డయాగ్నోస్టిక్స్‌ సెంటర్లలో రేడియాలజిస్టుల కొరత
• రోగులకు తప్పని ఆర్థిక భారం

బీఆర్‌ఎస్‌ ప్రభుత్వం ప్రతిష్టాత్మకంగా ప్రారంభించిన తెలంగాణ డయాగ్నోసిక్స్‌ సెంటర్లలోని స్కానింగ్‌ కేంద్రాలు, రేడియాలజిస్టు వైద్యులు లేక రోగులు ఇబ్బందులకు గురవుతున్నారు. గతంలో లక్షల మంది పేద రోగులకు ఆపన్న హస్తంగా నిలిచిన ఈ టీ-డయాగ్నోస్టిక్స్‌ కేంద్రాలు నేడు పాలకుల నిర్లక్ష్యం, అధికారులు అలసత్వంతో వెలవెలబోతున్నాయి.

పైసా ఖర్చు లేకుండా 57 రకాల రక్త పరీక్షలు, ఎక్స్‌రే, అల్ట్రాసౌండ్‌ స్కానిం6గ్‌, ఈసీజీ వంటి వైద్య పరీక్షలు నిర్వహించి ఉన్న రోగాలే కాకుండా రానున్న అనారోగ్య సమస్యలను ముందస్తుగానే గుర్తించి, సకాలంలో సరైన చికిత్స అందించేందుకు దోహదపడిన ఈ డయాగ్నోస్టిక్స్‌ సెంటర్లు సరైన నిర్వహణ లేక ఆగమాగమవుతున్నాయి.

సిటీబ్యూరో, నవంబర్‌ 14 (నమస్తే తెలంగాణ) : నిరుపేద రోగులకు చికిత్సతో పాటు సకాలంలో సరైన వైద్యపరీక్షలు చేయించాలనే ఉద్దేశంతో నాటి తెలంగాణ ప్రభుత్వం 2018, జనవరిలో టీ డయాగ్నోస్టిక్స్‌ సెంటర్లను ప్రారంభించిన విషయం తెలిసిందే. ఈ సెంటర్లలో రక్త పరీక్షలతో పాటు ఎక్స్‌-రే, ఈసీజీ, అల్ట్రాసౌండ్‌ తదితర వైద్యపరీక్షలను అందుబాటులోకి తీసుకొచ్చారు. ఈ సేవల వల్ల నిరుపేద రోగులకు ఖరీదైన వైద్య పరీక్షలు పూర్తి ఉచితంగా నిర్వహించడమే కాకుండా వ్యాధులను సకాలంలో గుర్తించగలిగారు. ఫలితంగా అటు రోగుల ఆరోగ్యం కాపాడడమే కాకుండా ఇటు ఆర్థిక భారాన్ని సైతం తగ్గించిగలిగారు.

సకాలంలో అందని నివేదికలు

వివిధ రకాల వైద్య పరీక్షలకు సంబంధించిన నివేదికల జారీలోనూ తీవ్ర జాప్యం జరుగుతోంది. గతంలో అయితే రక్త నమూనాలు ఇచ్చిన మరుసటి రోజే ఆయా వైద్యపరీక్షలకు సంబంధించిన నివేదికలను జారీ చేసేవారు. కానీ కొన్ని రోజులుగా సాంకేతిక లోపం సాకుతో రెండు మూడు రోజుల వరకు నివేదికలు రావడం లేదని రోగులు వాపోతున్నారు. చాలా సందర్భాల్లో అసలు నివేదికలు రాకపోవడంతో మళ్లీ సంబంధిత ఆరోగ్య కేంద్రాలకు పరుగులు తీయాల్సిన పరిస్థితి నెలకొందని బాధితులు ఆరోపిస్తున్నారు.

రేడియాలజిస్టులు లేక ..

మినీ డయాగ్నోస్టిక్‌ సెంటర్లలోస్కానింగ్‌ విభాగాల్లో రేడియాలజిస్టు వైద్యులు లేక రోగులు తీవ్ర ఇబ్బందులకు గురవుతున్నారు. అల్ట్రాసౌండ్‌ స్కానింగ్‌ చేయాలంటే రేడియాలజిస్టు వైద్యులు ఉండాలి. కానీ గ్రేటర్‌ పరిధిలోని దాదాపు 15 సెంటర్లలో రేడియాలజిస్టులు లేక స్కానింగ్‌ విభాగాలు అలంకారప్రాయంగా మారాయి. దీంతో రోగులకు ప్రైవేటు డయాగ్నోస్టిక్‌ సెంటర్లే శరణ్యంగా మారుతున్నాయి. ముఖ్యంగా గర్భిణులు స్కానింగ్‌ సదుపాయం లేక ఇబ్బందులకు గురవుతున్నారు.