రిఫ్రిజిరేటర్‌ కంప్రెషర్‌ పేలి ఇల్లు దగ్ధం

రిఫ్రిజిరేటర్‌ కంప్రెషర్‌ పేలి ఇల్లు దగ్ధమైంది. అయితే ఇంట్లో ఎవరూ లేక పోవడంతో ఎలాంటి ప్రాణ నష్టం జరగలేదు. ఈ ఘటన రాజేంద్రనగర్‌ పోలీస్‌ స్టేషన్‌ పరిధిలో చోటు చేసుకుంది.

బండ్లగూడ, నవంబర్‌ 10 : రిఫ్రిజిరేటర్‌ కంప్రెషర్‌ పేలి ఇల్లు దగ్ధమైంది. అయితే ఇంట్లో ఎవరూ లేక పోవడంతో ఎలాంటి ప్రాణ నష్టం జరగలేదు. ఈ ఘటన రాజేంద్రనగర్‌ పోలీస్‌ స్టేషన్‌ పరిధిలో చోటు చేసుకుంది. వివరాల్లోకి వెళ్తే…రాజేంద్రనగర్‌ సర్కిల్‌ పరిధిలోని శివసాయినగర్‌ కాలనీలో శ్రీకాంత్‌, కీర్తి దంపతులు నివాసం ఉంటున్నారు.

శ్రీకాంత్‌ సాఫ్ట్‌వేర్‌ ఉద్యోగి కాగా కీర్తి టీచర్‌గా పని చేస్తున్నారు. కాగా మంగళవారం ఉదయం వారిద్దరూ ఉద్యోగానికి వెళ్లారు. 10 గంటల సమయంలో ఇంట్లో నుంచి పొగలు రావడాన్ని గమనించిన స్థాని కులు శ్రీకాంత్‌కు, పోలీసులకు సమాచారం అందించారు. వారు వచ్చేసరికి మంటలు చెలరేగాయి. ఇంట్లోని స్తువులన్నీ కాలిబూడిదయ్యాయి. పోలీసుల సమాచారంతో ఫైర్‌ సిబ్బంది వచ్చి మంటలను అదుపులోకి తెచ్చారు. కాగా ఈ ఘటనపై ఇంకా ఎలాంటి ఫిర్యాదు అందలేదని పోలీసులు తెలిపారు.