Visit:
సిటీబ్యూరో, మే 12 ( నమస్తే తెలంగాణ ): శవానికి వైద్యం చేసినట్టు స్క్రాప్నకు వెళ్లే ఆటోకు ఫిట్నెస్ ఎందుకని వాహన సంఘాల నాయకులు ఆగ్రహం వ్యక్తం చేస్తున్నారు. రోడ్డుపై రాకపోకలు సాగించే ఆటోకు ఫిట్నెస్ ఉండాల్సిన అవసరం ఉంది. కానీ అదే ఆటో 15 ఏండ్లు పూర్తి చేసుకొని స్క్రాప్(తుక్కు)కు వెళ్లడానికి ఆర్టీఏకు దరఖాస్తు చేసుకుంటే ఫిట్నెస్ ఉండాలనే నిబంధనపై విమర్శలు వ్యక్తమవుతున్నాయి. బండి డొక్కై పూర్తిగా పనికిరానిదిగా మారిందనే కారణంతో డ్రైవర్ తన ఆటోను స్క్రాప్నకు ఇచ్చి అదే నంబర్పై మరో కొత్త ఆటో కొనుగోలు చేసుకునే వీలుంటుంది. ఇలాంటి సమయంలో స్క్రాప్నకు వెళ్లే డ్రైవర్కు ఫిట్నెస్ చార్జీలు అదనంగా రూ.3వేల వరకు భారం మోయాల్సి వస్తోంది. దీంతో స్క్రాప్ చేసే వాహనాలకు ఫిట్నెస్ లేకుండా ప్రక్రియ పూర్తి చేయాలని వాహన కార్మిక సంఘాలు డిమాండ్ చేస్తున్నాయి.
సాధారణంగా ఏ వాహనానికైనా కాల పరిమితి 15 ఏండ్లు. అనంతరం తుక్కు చేసుకోవాలి లేదా గ్రీన్ ట్యాక్స్ చెల్లించి మరో ఐదేండ్లకు అనుమతి తీసుకోవాల్సి ఉంటుంది. అయితే ఆటోకు మాత్రం ఫిటెనెస్ అడుగుతున్నారు. ఈ విధానంపై టీఏడీఎస్ ప్రధాన కార్యదర్శి సత్తిరెడ్డి మాట్లాడుతూ.. తుక్కుగా మారే ఆటోలకు ఫిట్నెస్ అవసరం లేదన్నారు. పనికిరాని ఆటోకు ఫిట్నెస్ చేయిస్తే దానివల్ల ఏం లాభం అని ప్రశ్నించారు. అనవసరంగా ఆటో డ్రైవర్లపై అదనపు భారం పడుతుందని చెప్పారు.
