Visit:
వెంగళరావునగర్‌, నవంబర్‌ 30 :ఇటీవల అమీర్‌పేటలోని ఓ ఇంట్లో వాషింగ్‌ మిషన్‌ పేలిన ఘటనలో ఎల్‌జీ వాషింగ్‌ మిషన్‌ కంపెనీపై ఎస్‌ఆర్‌.నగర్‌ పోలీసులు కేసు నమోదు చేశారు. అమీర్‌పేట ధరంకరం రోడ్డులోని కేకే ఎన్‌క్లేవ్‌లో గల 503వ నంబర్‌ ఫ్లాట్‌లో నివసించే వి.సుందర్‌ రామశాస్త్రి ఇంట్లో ఈ నెల 27వ తేదీన మధ్యాహ్నం రన్నింగ్‌లో ఉన్న వాషింగ్‌ మిషన్‌ పేలిపోయిన విషయం తెలిసిందే.
అదృష్టవశాత్తు ఘటనలో ఎవరికీ ఏమీ కానప్పటికీ, జరిగిన ఘటనపై బాధిత కుటుంబ సభ్యులు ఎల్‌జీ కష్టమర్‌ కేర్‌కు సమాచారం అందించారు. అయినప్పటికీ ఎల్‌జీ కస్టమర్‌ కేర్‌ విభాగం స్పందించకపోవడంతో ఎస్‌ఆర్‌.నగర్‌ పోలీసులకు ఫిర్యాదు చేశారు. లోపాలున్న వాషింగ్‌ మిషన్‌ను తమకు విక్రయించారని, దీంతో ప్రమాదం జరిగిందని బాధితులు ఫిర్యాదులో పేర్కొన్నారు. ఈ మేరకు పోలీసులు ఎల్‌జీ వాషింగ్‌ మిషన్‌ కంపెనీపై కేసు నమోదు చేసి దర్యాప్తు చేస్తున్నారు.
