జ్ఞాపకశక్తి తగ్గినా..కరోనా లక్షణమే..!

• మెదడుపై.. కరోనా ప్రభావం
• వైరస్‌ ధాటికి దెబ్బతింటున్న నరాలు
• స్టెరాయిడ్స్‌తో కంటిచూపు కోల్పోయే ప్రమాదం
• మానసికంగానూ మార్పులు.. డిప్రెషన్‌లోకి జారిపోతున్న జనం
• ఇప్పటికే నగరంలోని పలు దవాఖానల్లో నమోదైన కేసులు
• మాస్కు ఒక్కటే.. రక్షణ
• న్యూరో సర్జన్‌, సీనియర్‌ కన్సల్టెంట్‌ డాక్టర్‌ రంగనాథమ్‌

కరోనా వైరస్‌తో కేవలం దగ్గు, జలుబు, జ్వరం, ఒళ్లు నొప్పులు మాత్రమే కాదు.., ఆ ప్రభావం మెదడు, నరాలపైనా పడుతున్నదని ప్రముఖ న్యూరో సర్జన్‌, సీనియర్‌ కన్సల్టెంట్‌ డాక్టర్‌ రంగనాథమ్‌ స్పష్టం చేశారు. కరోనా వైరస్‌ ప్రభావం మెదడుపై పడటం వల్ల క్రమంగా జ్ఞాపక శక్తి కూడా తగ్గుతుందన్నారు. ఉదయం లేవగానే ఏ పనీ చేయలేకపోవడం, ఏదీ గుర్తుండక పోవడం, చికాకుగా ఉండటం వంటి లక్షణాలు ఉంటాయని తెలిపారు. అలాగే నిద్ర లేకపోవడంతో పాటు మానసిక సమస్యలు కూడా వస్తున్నాయని వెల్లడించారు. కంటిచూపు కూడా పోయే ప్రమాదం ఉందని.. వీటిని ముందుగానే గుర్తించి కరోనా పరీక్షలు చేయించుకోవాలని సూచించారు. ఈ సందర్భంగా న్యూరో సర్జన్‌ డాక్టర్‌ రంగనాథమ్‌తో ‘నమస్తే తెలంగాణ’ ప్రత్యేక ఇంటర్వ్యూ.. వివరాలు ఆయన మాటల్లోనే…

నరాలపై తీవ్ర ప్రభావం..

• కరోనా వైరస్‌ వేగంగా వ్యాప్తి చెందుతున్నది.
• చాలా మందికి తమకు వైరస్‌ వచ్చింది అన్న సంగతి తెలియడం లేదు.
• దగ్గు, జలుబు, జ్వరం, ఒళ్లు నొప్పులు వంటి లక్షణాలు మాత్రమే ఉంటాయనుకుంటున్నారు.
• అంతకంటే ముందుగానే కొంత మందిలో నరాలపైనా ఆ ప్రభావం పడుతుంది.
• ఫలితంగా మెదడు సరిగా పనిచేయదు. కరోనా సోకడంతో మెదడుపై పలుచని పొర ఏర్పడుతుంది.
• వైరస్‌ ఉన్న వ్యక్తికి క్రమంగా జ్ఞాపక శక్తి తగ్గుతుంది. ఏ పనీ చేయలేరు.
• చికాకుగా ఉంటుంది. ఇలాంటి కేసులు మాదాపూర్‌లోని ఓ ప్రైవేటు దవాఖానలో కొన్ని నమోదయ్యాయి.
• 50 ఏండ్లు దాటిన ఓ పేషెంట్‌ జ్ఞాపక శక్తి తగ్గిందంటూ దవాఖానకు రాగా పరీక్షలు నిర్వహించారు. అందులో ఈ విషయం స్పష్టమైంది.

మానసికంగా మార్పులు..

కరోనా సోకిన వారిలో మానసికమైన మార్పులు వస్తున్నాయి. త్వరగా డిప్రెషన్‌కు గురవుతున్నారు.
మానసిక ధైర్యం సన్నగిల్లుతుంది. ప్రతి చిన్న విషయాన్ని పెద్దదిగా ఊహించుకుంటారు.
అలాగే నిద్ర ఉండదు. ఈ క్రమంలో మానసిక వైద్యులను సంప్రదించాలి.

వ్యాక్సిన్‌ తీసుకున్నా.. జాగ్రత్తలు తప్పనిసరి..

• కరోనా బారిన పడి బాధ పడే కంటే.. వైరస్‌ సోకకుండా ముందస్తు జాగ్రత్తలు తీసుకోవాలి.
• ఈ విషయాన్ని ప్రతి ఒక్కరూ గుర్తించాలి.
• అందులో భాగంగానే డాక్టర్లు కూడా ఆన్‌లైన్‌ కన్సల్టేషన్‌ ద్వారా వైద్యం అందుబాటులోకి తీసుకువచ్చారు.
• వైరస్‌ను నియంత్రించడానికి ముందు జాగ్రత్త చర్యలు, మాస్కు ధరించడమే శ్రీరామ రక్ష.
• పోషక విలువలతో కూడిన భోజనం తీసుకోవాలి.
• యాంటీబాడీలు పెంచుకోవాలి.
• ప్రస్తుతం వ్యాక్సిన్‌ అందుబాటులోకి వచ్చినప్పటికీ అందరికీ వ్యాక్సినేషన్‌ ప్రక్రియ పూర్తి కావడానికి సమయం పడుతుంది.
• వ్యాక్సిన్‌ తీసుకున్నప్పటికీ మాస్కు ధరించాలి.

మహారాష్ట్రంలో 40శాతం మందిలో యాంటీబాడీస్‌

ప్రస్తుతం మహారాష్ట్రంలోని 40శాతం జనాభాలో యాంటీబాడీస్‌ తయారయ్యాయి. ఈ విషయాన్ని ఆ రాష్ట్ర ప్రభుత్వం ప్రకటించింది. కరోనా అంతానికి ఇది శుభపరిణామంగా భావిస్తున్నారు. మహారాష్ట్రంలో మే రెండో వారంలోగా కరోనా కేసులు పూర్తిగా తగ్గే అవకాశం ఉందని అక్కడి ప్రభుత్వం అంచనా వేస్తుంది. ప్రతి ఒక్కరూ వ్యాక్సిన్‌ తీసుకొని యాంటీబాడీస్‌ పెంచుకోవాలి.

రుచి, వాసన పోతుంది…

• కరోనా సోకిన వారిలో ముందుగానే రుచి, వాసన పోతుంది.
• ముక్కు, గొంతులో పలుచని నరాలు ఉంటాయి.
• వైరస్‌ సోకిన వ్యక్తి ముక్కు రంధ్రాలు, గొంతులోని పలుచని నరాలు పనిచేయవు.
• దీంతో వాసన పూర్తిగా కోల్పోతారు.
• అయితే ఇదంతా దగ్గు, జలుబు, జ్వరం లేకుండా వైరస్‌ సోకిన వ్యక్తి శరీరంలో ఉండే లక్షణాలు.
• ఇలాంటి లక్షణాలు ఉన్న వారు వెంటనే హోం ఐసొలేషన్‌లోకి వెళ్లాలి. డాక్టర్‌ను సంప్రదించి మందులు తీసుకోవాలి.

కంటిచూపు తగ్గుతుంది

కరోనా బారిన పడి వెంటిలేషన్‌పై ఉన్న కొందరికి స్టెరాయిడ్స్‌ ఎక్కిస్తున్నారు. దీన్ని కంటిలో ఉండే సన్నని నరాలు తట్టుకోలేవు. దీంతో కంటి చూపు మందగిస్తుంది. పూర్తిగా కోల్పోయే ప్రమాదం కూడా ఉన్నది. గత నాలుగు రోజుల కిందట నగరంలోని ఒక ప్రైవేటు దవాఖానలో ఈ విషయం బయటపడింది. అయితే కొంత మందిలో కనురెప్పలపై బొబ్బలు, విపరీతమైన నొప్పి వస్తుందని డాక్టర్లు గుర్తించారు.