మారేడ్‌పల్లి తహసీల్దార్‌ సస్పెండ్‌

మారేడ్‌పల్లి తహసీల్దార్‌ పద్మ సుందరిపై వేటు పడింది. విధుల పట్ల నిర్లక్ష్యంగా వ్యవహరిస్తుండటంతో కలెక్టర్‌ ఆమెను సస్పెండ్‌ చేశారు. కలెక్టర్‌ అనుదీప్‌ దురిశెట్టి గురువారం మారేడ్‌పల్లి ఎమ్మార్వో కార్యాలయాన్ని ఆకస్మికంగా తనిఖీ చేశారు.

• గిర్దావర్‌, రికార్డు అసిస్టెంట్‌ సైతం..

సిటీబ్యూరో, జూన్‌ 20 ( నమస్తే తెలంగాణ) : మారేడ్‌పల్లి తహసీల్దార్‌ పద్మ సుందరిపై వేటు పడింది. విధుల పట్ల నిర్లక్ష్యంగా వ్యవహరిస్తుండటంతో కలెక్టర్‌ ఆమెను సస్పెండ్‌ చేశారు. కలెక్టర్‌ అనుదీప్‌ దురిశెట్టి గురువారం మారేడ్‌పల్లి ఎమ్మార్వో కార్యాలయాన్ని ఆకస్మికంగా తనిఖీ చేశారు. ఆ సమయంలో తహసీల్దార్‌ అందుబాటులో లేరు. వివిధ సేవల కోసం వచ్చిన ప్రజలు ఆరు బయట తహసీల్దార్‌ కోసం ఎదురుచూస్తున్నారు. అక్కడున్న అధికారులను అడిగినా తమకు తెలియదని చెప్పారు. రికార్డు రిజిస్టర్లు సైతం గందరగోళంగా ఉన్నాయి.

మారేడ్‌పల్లిలో అత్యంత విలువైన ప్రభుత్వ భూములు వందల ఎకరాల్లో ఉన్నాయి. ముఖ్యంగా కేంద్ర ప్రభుత్వానికి చెందిన శత్రు భూములు ఉన్నాయి. అందులో చాలా భూములు కోర్టు కేసుల్లో ఉన్నాయి. వీటిని ఎప్పటికప్పుడు పర్యవేక్షించి ఉన్నతాధికారులకు రిపోర్ట్‌ ఇస్తుండాలి. కానీ తహసీల్దార్‌ ఈ రికార్డుల పర్యవేక్షణ విషయంలో నిర్లక్ష్యం వహించారనే ఆరోపణలు వచ్చాయి. మరోవైపు వివిధ సేవల కోసం వచ్చిన ప్రజలను సైతం నిర్ణీత సమయంలో పనులు చేయకుండా తిప్పలు పెట్టారు. ఈ వ్యవహారంపై ప్రజావాణిలో కలెక్టర్‌కు ఫిర్యాదులు అందాయి. దీంతో కలెక్టర్‌ ఆకస్మిక పర్యటన చేసి పలు రికార్డులను పరిశీలించడంతో పాటు అక్కడి వ్యవహారాన్ని తెలుసుకున్నారు. అనంతరం తహసీల్దార్‌తో పాటు గిర్ధ్దావర్‌ పి.ప్రసన్న లక్ష్మి, రికార్డు అసిస్టెంట్‌ ఎస్‌.రవిలను సైతం సస్పెండ్‌ చేస్తూ ఆదేశాలు ఇచ్చారు.