జన్మ సాఫల్యం

సృష్టిలో ఎన్నో జీవరాశులు ఉన్నప్పటికీ, మానవ జన్మను అత్యంత విశిష్టమైనదిగా, దుర్లభమైనదిగా ఆధ్యాత్మిక గ్రంథాలు అభివర్ణిస్తాయి.

సృష్టిలో ఎన్నో జీవరాశులు ఉన్నప్పటికీ, మానవ జన్మను అత్యంత విశిష్టమైనదిగా, దుర్లభమైనదిగా ఆధ్యాత్మిక గ్రంథాలు అభివర్ణిస్తాయి. ప్రతి మనిషి పుట్టుక వెనుక ఒక ప్రత్యేకమైన అర్థం, ఒక నిర్దిష్టమైన గమ్యస్థానం ఉంటాయి. అదే మన అసలు సిసలైన ‘లక్ష్యం’. కేవలం లౌకిక సుఖాలను అనుభవించడం, సంపదను సంపాదించడం మాత్రమే మానవ జీవిత పరమార్థం కాదని, దానికంటే ఉన్నతమైన ఆత్మ సాక్షాత్కారమే మన పరమ లక్ష్యమని ఆధ్యాత్మికత మనకు బోధిస్తుంది.

కోట్లాది జన్మల పుణ్యఫలంగా లభించిన మానవ జన్మ కేవలం తింటూ, తిరుగుతూ కాలం గడపడానికి కాదు. ఇతర జంతువులకు లేని విచక్షణ జ్ఞానం కేవలం మానవుడికే ఉంది. ఈ అరుదైన అవకాశాన్ని సద్వినియోగం చేసుకొని, జీవితాన్ని సార్థకం చేసుకోవడమే ప్రథమ కర్తవ్యం. ఆధ్యాత్మిక దృష్టిలో మన అంతిమ లక్ష్యం ‘ఆత్మను తెలుసుకోవడం’ (ఆత్మజ్ఞానం). మనం ఈ శరీరం మాత్రమే కాదని, మనలో ఉన్నది అనంతమైన దివ్య చైతన్యమని గుర్తించడమే జ్ఞానం.

మనలోని అంతరాత్మను పరమాత్మతో అనుసంధానం చేయడం, సర్వత్ర దైవత్వాన్ని చూడటమే జీవితపు అసలైన గమ్యం. దైవంపై అనన్యమైన ప్రేమ, శ్రద్ధ, ప్రార్థనల ద్వారా మనసును పవిత్రం చేసుకోవడం. గ్రంథ పఠనం, గురువుల మార్గదర్శకత్వం ద్వారా సత్యాన్ని అన్వేషించాలి. అజ్ఞానాన్ని తొలగించుకోవాలి. ఫలాపేక్ష లేకుండా తన కర్తవ్యాన్ని శ్రద్ధగా నిర్వర్తించడం, తోటివారికి సేవ చేయడం మనిషి లక్షణం కావాలి. మనసును, ఇంద్రియాలను నిగ్రహించి, అంతర్ముఖులు కావడం ద్వారా ప్రశాంతతను పొందాలి. ఈ దివ్య లక్ష్యాన్ని చేరుకోవడానికి మన పెద్దలు, రుషులు వివిధ మార్గాలను నిర్దేశించారు.

భగవంతుడి అవతారాలు దశావతారాలకే పరిమితం కావు. శ్రీమద్భాగవతం ప్రకారం ‘అవతారా హ్యసంఖ్యేయాః’ అంటే సాగరంలోంచి నిరంతరం లేచే అలల వలె భగవంతుని అవతారాలు అపరిమితం. ధర్మాన్ని పునరుద్ధరించడానికి, భక్తులను ఆదుకోవడానికి, శుద్ధభక్తిని లోకంలో విస్తరింపజేయడానికి పరమాత్ముడు యుగయుగాలూ వివిధ రూపాల్లో అవతరిస్తూనే ఉంటాడు. భగవంతుడు తన లీలల ద్వారా, వివిధ అవతారాల ద్వారా మనకు పారమార్థిక మార్గాన్ని సుగమం చేస్తూనే ఉన్నాడు. మనం చేయాల్సిందల్లా ఆ సూక్ష్మ ప్రకాశాన్ని గ్రహించి నిష్కామంతో అడుగులు వేయడమే.

బాహ్య ప్రపంచంలో విజయాలు సాధించడం ఎంత ముఖ్యమో, అంతకంటే ఎక్కువగా అంతర్ముఖులై మన అంతరాత్మను శుద్ధం చేసుకోవడం ముఖ్యం. సంసార సాగరంలో బాధ్యతలను నిర్వర్తిస్తూనే, మన గమ్యాన్ని, భగవత్‌ తత్వాన్ని విస్మరించకుండా జీవించడమే నిజమైన మానవ జన్మ సాఫల్యం. ఆధ్యాత్మిక సంప్రదాయంలో ‘జన్మ సాఫల్యం’ అంటే లౌకికమైన భోగభాగ్యాలను లేదా ధన, కనక, వస్తు, వాహనాలను పొందడం కాదు.

జన్మెత్తినందుకు జీవితాన్ని సార్థకం చేసుకోవడం, పునర్జన్మ లేని ముక్తిని (మోక్షాన్ని) పొంది పరమాత్మలో ఐక్యం కావడమే జన్మ సాఫల్యం. పుట్టుకకు, మరణానికి మధ్య ఉన్న కాలాన్ని ధర్మబద్ధంగా జీవిస్తూ, మనలోని దివ్యత్వాన్ని గుర్తించి, తోటి మానవులకు ఉపయోగపడటమే నిజమైన జన్మ సాఫల్యం. జీవితంలో సుఖదుఃఖాలు అనేవి ప్రకృతి సహజం, వాటిని ఎవరూ పూర్తిగా తొలగించలేరు. కానీ, ద్వంద్వాలకు అతీతంగా ప్రయాణించడమే నిజమైన మానవ వికాసం.

-తరిగొప్పుల వీఎల్‌ఎన్‌ మూర్తి 80085 77834