టిక్‌టాక్‌ వీడియోనే ఆమె ప్రాణాలు తీసిందా?.. 1100 కిలోమీటర్లు ప్రయాణించి చంపేసిన భర్త!

విడాకులు అనేవి విఫలమైన వివాహ జీవితాలకు సాక్ష్యాలుగా మిగిలిపోతాయి. కొంతమందికి అవి విముక్తి కలిగిస్తే.. మరికొందరికి చేదు జ్ఞాపకాలుగానే ఉంటాయి. అలాగే జరిగింది పాకిస్తానీ అమెరికన్ అయిన సానియా ఖాన్ జీవితంలో. ఆమె ఐదేళ్ల పాటు రాహేల్ అహ్మద్ అనే వ్యక్తితో డేటింగ్ చేసింది. ఆ తర్వాత ఇద్దరూ పెళ్లి చేసుకున్నారు. కానీ వాళ్ల పెళ్లి ఎక్కువ కాలం నిలవలేదు. దీంతో విడాకులు తీసుకున్నారు.

అనంతరం టిక్‌ టాక్‌లో విడాకులు తీసుకొని, ట్రామాలో ఉన్న మహిళలకు సలహాలు ఇస్తూ సానియా మంచి ఫాలోవర్లను సంపాదించుకుంది. అలాగే పెళ్లిళ్ల వంటి శుభకార్యాలకు ఫొటోగ్రఫీ కూడా చేసేది. ఇటీవల ఒక టిక్‌టాక్‌ వీడియోలో తన విడాకుల గురించి, ఆ చేదు అనుభవాల గురించి చెప్పింది. ఈ విషయం భర్త రాహేల్‌కు నచ్చలేదు. దీంతో జార్జియా నుంచి చికాగోకు వచ్చి మరీ ఆమెను కాల్చిపారేశాడు.

సమాచారం అందుకొని ఘటనా స్థలానికి చేరుకున్న పోలీసులకు సానియా, రాహేల్ ఇద్దరి మృతదేహాలు కనిపించాయి. సానియాను చంపిన తర్వాత రాహేల్ కూడా అదే తుపాకీతో కాల్చుకొని ఆత్మహత్య చేసుకున్నాడు.

రాహేల్ ఇంటి నుంచి సడెన్‌గా అలా వెళ్లిపోవడంతో పోలీసులకు మిస్సింగ్ కంప్లయింట్ ఇచ్చిన అతని కుటుంబం.. ‘‘పెళ్లి సమస్యను పరిష్కరించడానికి’’ వెళ్తున్నట్లు చెప్పాడని తెలిపారు. సానియా మృతి పట్ల ఆమె స్నేహితులు, కుటుంబ సభ్యులు తీవ్రమైన ఆవేదన వ్యక్తం చేశారు. చికాగో నుంచి వెళ్లిపోవాలని అనుకుంటున్నానని, త్వరలోనే కొత్త జీవితాన్ని ప్రారంభిస్తానని ఆమె చెప్పినట్లు స్నేహితులు వెల్లడించారు.