కంట్లో కారం చల్లి… నగలు దోచుకున్న తండ్రీకూతుళ్లు

లక్నో: తండ్రీకూతుళ్లు కలిసి నగల చోరీకి పాల్పడ్డారు. జ్యుయలరీ షో రూమ్‌ సిబ్బంది కంట్లో కారం చల్లి బంగారు ఆభరణాలు దోచుకున్నారు. ఉత్తర ప్రదేశ్‌లోని ఘజియాబాద్‌లో ఈ సంఘటన జరిగింది. బుధవారం సిహాని గేట్ ప్రాంతంలోని ఒక జ్యుయలరీ షాపునకు తండ్రీ, కుమార్తె వెళ్లారు. కస్టమర్ల మాదిరిగా వారిద్దరూ బిల్డప్‌ ఇచ్చారు. గోల్డ్‌ చెయిన్ల కొనుగోలు కోసం అక్కడి సిబ్బందితో మాట్లాడారు. కుమార్తె పక్కనే కూర్చోగా ఆ వ్యక్తి గోల్డ్‌ చెయిన్‌ను తన మెడలో వేసుకుని ముందున్న అద్దంలో చూసుకున్నాడు. అనంతరం అతడి మెడలోని గొలుసును తీసేందుకు సిబ్బంది సహకరించారు.

కాగా, కుమార్తె ఉన్నట్టుండి తన చేతిలోని కారాన్ని సిబ్బంది ముఖంపై చల్లింది.  మరోవైపు ట్రేలోని బంగారు నగలను ఆ వ్యక్తి లాక్కొని అక్కడి నుంచి పారిపోయాడు. సిబ్బంది పట్టుకునేందుకు ప్రయత్నించారు. అయితే సిబ్బందిలో ఒకరు ఆ మహిళ వేసుకున్న టీ షర్టు కాలర్‌ను గట్టిగా పట్టుకుని పారిపోకుండా నిలువరించారు. దీంతో ఆ వ్యక్తి కుమార్తె వారికి చిక్కింది. అక్కడి సీసీటీవీలో రికార్డైన ఈ వీడియో సోషల్‌ మీడియాలో వైరల్‌ అయ్యింది.