Varanasi | ‘వారణాసి’లో చిన్న‌నాటి మహేష్‌గా అభయ్ రామ్ .. రాజమౌళి సినిమాపై వైరల్ అవుతున్న కొత్త టాక్!

Varanasi | టాలీవుడ్ సూపర్ స్టార్ మహేష్ బాబు హీరోగా, దర్శకధీరుడు ఎస్.ఎస్. రాజమౌళి తెరకెక్కిస్తున్న ప్రతిష్ఠాత్మక పాన్ వరల్డ్ చిత్రం ‘వారణాసి’పై రోజురోజుకూ అంచనాలు పెరుగుతున్నాయి. టైమ్ ట్రావెల్ నేపథ్యంలో రూపొందుతున్న ఈ అడ్వెంచర్ డ్రామా ప్రస్తుతం శరవేగంగా చిత్రీకరణ జరుపుకుంటోంది.

Varanasi | టాలీవుడ్ సూపర్ స్టార్ మహేష్ బాబు హీరోగా, దర్శకధీరుడు ఎస్.ఎస్. రాజమౌళి తెరకెక్కిస్తున్న ప్రతిష్ఠాత్మక పాన్ వరల్డ్ చిత్రం ‘వారణాసి’పై రోజురోజుకూ అంచనాలు పెరుగుతున్నాయి. టైమ్ ట్రావెల్ నేపథ్యంలో రూపొందుతున్న ఈ అడ్వెంచర్ డ్రామా ప్రస్తుతం శరవేగంగా చిత్రీకరణ జరుపుకుంటోంది. అయితే ఈ సినిమాకు సంబంధించి తరచూ ఏదో ఒక వార్త సోషల్ మీడియాలో వైరల్ అవుతుండగా, తాజాగా మరో ఆసక్తికర ప్రచారం సినీ వర్గాల్లో చర్చనీయాంశంగా మారింది. తాజా టాక్ ప్రకారం, జూనియర్ ఎన్టీఆర్ కుమారుడు అభయ్ రామ్ ఈ సినిమాలో కీలక పాత్రలో కనిపించనున్నారనే వార్త వైరల్ అవుతోంది. అంతేకాదు, సినిమాలో మహేష్ బాబు చిన్ననాటి పాత్రను అభయ్ రామ్ పోషించనున్నారనే ప్రచారం అభిమానుల్లో ఆసక్తిని రేకెత్తిస్తోంది.

ఇండస్ట్రీ వర్గాల్లో వినిపిస్తున్న సమాచారం ప్రకారం, సినిమాలో చిన్న మహేష్ పాత్ర కథలో ఎంతో కీలకంగా ఉంటుందట. ఆ పాత్రకు కావాల్సిన లుక్, స్క్రీన్ ప్రెజెన్స్‌ను దృష్టిలో పెట్టుకుని రాజమౌళి ప్రత్యేకంగా అభయ్ రామ్‌ను ఎంపిక చేయాలని భావించారనే ప్రచారం జరుగుతోంది. రాజమౌళి, ఎన్టీఆర్ మధ్య ఉన్న సన్నిహిత అనుబంధం కారణంగా ఈ ప్రతిపాదనకు ఎన్టీఆర్ కూడా వెంటనే అంగీకరించారనే వార్తలు వినిపిస్తున్నాయి. అయితే ఈ విషయంపై చిత్రబృందం నుంచి ఇప్పటివరకు ఎలాంటి అధికారిక ప్రకటన రాలేదు. రాజమౌళి తన సినిమాలకు సంబంధించిన వివరాలను పూర్తి గోప్యంగా ఉంచడం తెలిసిందే. ముఖ్యంగా ‘వారణాసి’ వంటి భారీ ప్రాజెక్ట్ విషయంలో ఒక్కో అప్డేట్‌ను కూడా సరైన సమయం వచ్చిన తర్వాతే వెల్లడించే అవకాశం ఉంది.

ఈ వార్త సోషల్ మీడియాలో వైరల్ కావడంతో నందమూరి అభిమానులు ఆనందం వ్యక్తం చేస్తున్నారు. ఇప్పటికే ఎన్టీఆర్ నటనతో ప్రేక్షకులను అలరిస్తుండగా, ఇప్పుడు ఆయన కుమారుడు కూడా వెండితెరపై కనిపిస్తే చూడాలని అభిమానులు ఆసక్తిగా ఎదురుచూస్తున్నారు. మరోవైపు, మహేష్ బాబు చిన్ననాటి పాత్రలో అభయ్ రామ్ కనిపిస్తే అది సినిమా హైలైట్‌గా నిలుస్తుందని పలువురు అభిప్రాయపడుతున్నారు. ఇక కొందరు అభిమానులు మరో ఆసక్తికర పోలికను కూడా తెరపైకి తీసుకొస్తున్నారు. గతంలో మహేష్ బాబు కుమారుడు గౌతమ్ కృష్ణ వెండితెరకు పరిచయమైన సందర్భాన్ని గుర్తు చేస్తూ, ఇప్పుడు అభయ్ రామ్‌ను రాజమౌళి పరిచయం చేస్తే అది నందమూరి అభిమానులకు ప్రత్యేక క్షణంగా నిలుస్తుందని సోషల్ మీడియాలో కామెంట్లు చేస్తున్నారు.