Trivikram | ప్రభాస్‌లో ఆ యాంగిల్‌ను ఎవరూ చూపించలేదు.. త్రివిక్రమ్‌ ఆసక్తికర వ్యాఖ్యలు!

Trivikram | టాలీవుడ్‌లో మాటల మాంత్రికుడిగా గుర్తింపు తెచ్చుకున్న దర్శకుడు త్రివిక్రమ్‌ శ్రీనివాస్‌ ప్రస్తుతం వెంకటేశ్‌ కథానాయకుడిగా తెరకెక్కుతున్న ‘ఆదర్శ కుటుంబం’ సినిమాతో బిజీగా ఉన్నారు.

Trivikram | టాలీవుడ్‌లో మాటల మాంత్రికుడిగా గుర్తింపు తెచ్చుకున్న దర్శకుడు త్రివిక్రమ్‌ శ్రీనివాస్‌ ప్రస్తుతం వెంకటేశ్‌ కథానాయకుడిగా తెరకెక్కుతున్న ‘ఆదర్శ కుటుంబం’ సినిమాతో బిజీగా ఉన్నారు. ఈ క్రమంలో తాజాగా ‘జయమ్ము నిశ్చయమ్మురా’ రెండో సీజన్‌లో పాల్గొన్న ఆయన.. పాన్‌ ఇండియా స్టార్‌ ప్రభాస్‌ గురించి ఆసక్తికరమైన వ్యాఖ్యలు చేసారు. ముఖ్యంగా ప్రభాస్‌లోని కామెడీ యాంగిల్‌ గురించి త్రివిక్రమ్‌ చేసిన వ్యాఖ్యలు ఇప్పుడు అభిమానుల్లో చర్చకు దారితీస్తున్నాయి. ప్రభాస్‌ అంటే చాలామంది ప్రేక్షకులకు భారీ యాక్షన్‌ సన్నివేశాలు, పవర్‌ఫుల్‌ డైలాగులు, భావోద్వేగభరితమైన పాత్రలు గుర్తుకొస్తాయి. అయితే ఆయనలో మంచి కామెడీ టైమింగ్‌ కూడా ఉందని త్రివిక్రమ్‌ అభిప్రాయపడ్డారు

ప్రభాస్‌లోని హాస్య కోణాన్ని ఇప్పటివరకు దర్శకులు పూర్తిస్థాయిలో ఉపయోగించుకోలేదని ఆయన అన్నారు. ప్రభాస్‌ తెరపై కనిపించే తీరు, ఆయన సహజమైన హాస్యాన్ని సరైన కథలో చూపించగలిగితే ప్రేక్షకులకు కొత్త అనుభూతి కలుగుతుందని అభిమానులు భావిస్తున్నారు. ముఖ్యంగా ప్రభాస్‌ అభిమానులు ఆయనను విభిన్నమైన పాత్రల్లో చూడాలని ఎప్పటి నుంచో కోరుకుంటున్నారు. యాక్షన్‌ హీరోగా దేశవ్యాప్తంగా గుర్తింపు తెచ్చుకున్న ప్రభాస్‌.. హాస్యానికి ప్రాధాన్యం ఉన్న పాత్రలో నటిస్తే ఎలా ఉంటుందనే ఆసక్తి కూడా నెలకొంది. ప్రభాస్‌ నటించిన చిత్రాల్లో ‘బుజ్జిగాడు’ ప్రత్యేకమైనది. పూరీ జగన్నాథ్‌ దర్శకత్వంలో రూపొందిన ఈ సినిమాలో ప్రభాస్‌ తనదైన శైలి, మాటతీరుతో ప్రేక్షకులను అలరించారు. ముఖ్యంగా ఆయన పాత్రలో కనిపించిన చిలిపితనం, హాస్యం అభిమానులకు గుర్తుండిపోయాయి.

ప్రభాస్‌లోని ఈ కోణాన్ని ప్రస్తావిస్తూ త్రివిక్రమ్‌ ఆసక్తి వ్యక్తం చేసారు. సరైన కథ, పాత్ర ఉంటే ప్రభాస్‌ కామెడీ టైమింగ్‌ను మరింత ఆకర్షణీయంగా తెరపై ఆవిష్కరించే అవకాశం ఉందని సినీ అభిమానులు చర్చించుకుంటున్నారు. ఇప్పటివరకు ప్రభాస్‌ ఎక్కువగా భారీ యాక్షన్‌ చిత్రాలతో ప్రేక్షకుల ముందుకు వచ్చిన నేపథ్యంలో.. ఆయనలోని హాస్య కోణానికి పెద్దపీట వేసే సినిమా వస్తే కొత్తదనం ఉంటుందని భావిస్తున్నారు. ప్రభాస్‌తో సినిమా చేయాలనే ఆలోచ‌న‌ త్రివిక్రమ్‌కి వ‌చ్చింద‌ని కొంద‌రు ముచ్చ‌టించుకుంటున్నారు. ప్రస్తుతం ప్రభాస్‌ చేతిలో పలు భారీ ప్రాజెక్టులు ఉన్నాయి. పాన్‌ ఇండియా స్థాయిలో ఆయనకు ఉన్న మార్కెట్‌, సినిమాల నిర్మాణానికి అవసరమయ్యే సమయం, షూటింగ్‌ షెడ్యూళ్లను దృష్టిలో పెట్టుకుంటే కొత్త ప్రాజెక్టును ప్రారంభించడానికి కొంత సమయం పట్టే అవకాశం ఉంది. అందుకే త్రివిక్రమ్‌–ప్రభాస్‌ కాంబినేషన్‌ కార్యరూపం దాల్చుతుందా? దాల్చితే ఎప్పుడు మొదలవుతుంది? అన్న ప్రశ్నలు అభిమానుల్లో వినిపిస్తున్నాయి.