వెండితెరపై వేల్పులు

దేవుడు, దెయ్యం.. ఈ రెంటినీ మించిన ఇంట్రస్టింగ్‌ టాపిక్‌ మరొకటుండదు. అమ్మ పొత్తిళ్ల నుంచే మొదలయ్యే ఇంట్రస్ట్‌ఇది. బువ్వ తినకపోతే బూచోడు ఎత్తికెళ్లిపోతాడంటూ భయపెట్టి తినిపించిన గోరుముద్దలు.. అల్లరి చేస్తే దేవుడు కొడతాడంటూ నేర్పిన భయం.. ఇవన్నీ రక్తంలో ఇంకి.. అందరికీ నరనరానా జీర్ణించుకుపోయాయి.

దేవుడు, దెయ్యం.. ఈ రెంటినీ మించిన ఇంట్రస్టింగ్‌ టాపిక్‌ మరొకటుండదు. అమ్మ పొత్తిళ్ల నుంచే మొదలయ్యే ఇంట్రస్ట్‌ఇది. బువ్వ తినకపోతే బూచోడు ఎత్తికెళ్లిపోతాడంటూ భయపెట్టి తినిపించిన గోరుముద్దలు.. అల్లరి చేస్తే దేవుడు కొడతాడంటూ నేర్పిన భయం.. ఇవన్నీ రక్తంలో ఇంకి.. అందరికీ నరనరానా జీర్ణించుకుపోయాయి.

ఇక ఎదుగుతూ చదివిన బేతాళ కథలు.. అమరచిత్ర కథలు.. ఇవన్నీ ప్రతి మనిషి జీవితంలోనూ జ్ఞానంతోపాటు ఓ ఊహా ప్రపంచాన్ని సృష్టించేశాయి. ఇవే కొన్ని నమ్మకాలకూ కారణాలయ్యాయి. పాపాలు పెరిగిపోయినప్పుడు.. అధర్మం రాజ్యమేలుతున్నప్పుడు.. అమాయకులు అన్యాయాలకు గురవుతున్నప్పుడు.. వీటన్నింటినీ అంతం చేసేందుకు భగవంతుడు అవతరిస్తాడన్న ఊహ ఏదైతే ఉందో.. ఆ ఫిక్షన్‌ని ఎంజాయ్‌ చేసేందుకు జనం ఇష్టపడటానికి కారణం ఇదే. మన పురాణ కథలు ఎలాగూ ఉన్నాయి. పసితనం నుంచి మొదలైన ఇంట్రస్ట్‌ కావడంతో నాస్తికులు సైతం విమర్శించడానికైనా చూడ్డం, వినడం చేస్తారు. అందుకే సినిమా వాళ్లకు ఇది పెద్ద కమర్షియల్‌ ఫార్ములా అయి కూర్చుంది.

తొలినాళ్లలో ఈ తరహా పురాణ కథల్ని జనం బాగా ఎంజాయ్‌ చేశారు.. ఆ తర్వాత మన సినీ క్రియేటర్స్‌ కొత్తగా ఆలోచించడం మొదలుపెట్టారు. సినిమా అంటే ‘జనానికి నచ్చే తప్పులు చేయడం’ అనే సిద్ధాంతాన్ని తు.చ. తప్పక పాటిస్తూ.. కృత, త్రేతా, ద్వాపరయుగాల్లో చాలామందికి ప్రత్యక్షమై కటాక్షించిన దైవాలందర్నీ.. క్రీస్తుపూర్వం, క్రీస్తుశకం నుంచి ఏకంగా నేటి సమాజానికి కూడా అనుసంధానం చేస్తూ కథలు అల్లేయడం మొదలుపెట్టారు. జి.వి.ఆర్‌.ఆదిశేషగిరిరావు, రామనారాయణ, కోడి రామకృష్ణ తదితర దర్శకులు ఈ కోవకు చెందినవారే. గుడిలో ఉండే దేవతలు కదలివచ్చి కరుణించేసినట్టు.. దుష్టసంహారం చేసేసినట్టు వాళ్లు సినిమాలు తీస్తే… ఇక జనాలేమో తమ నమ్మకాలకూ, భక్తికీ తగిన కానుకల్ని చెల్లించేసి థియేటర్లకు కాసుల వర్షం కురిపించేశారు. మా ఇలవేల్పు, కదలివచ్చిన కనకదుర్గ, శ్రావణ శుక్రవారం, అమ్మోరు, దేవి, త్రినేత్రం, దేవుళ్లు.. ఇలా చెబుతూపోతే ఈ తరహా సినిమాలు చాలా వచ్చాయి అప్పట్లో.

అయితే.. స్టార్‌హీరోలు మాత్రం ఇలాంటి కథల జోలికి అంతగా పోలేదు. ఫాంటసీ సినిమాలు చేసినా.. ‘సోషల్‌ సినిమాలో దేవుడు’ అనే కాన్సెప్ట్‌కు మాత్రం వాళ్లు దూరంగా ఉంటూవచ్చారు. ఏదో ఒకటీ అరా సన్నివేశాల్లోనో.. లేక ‘జై చిరంజీవా.. జగదేకవీరా..’ లాంటి అడపాదడపా వచ్చే పాటల్లోనూ చిన్న ఎమోషన్‌ కోసం దేవుడ్ని వాడేసేవాళ్లు. అయితే.. ఒక స్టార్‌ హీరో జనం కొలిచే దైవం నేపథ్యంతో ఫాంటసీ సినిమా చేయడం ప్రప్రథమంగా జరిగింది మాత్రం ‘దేవీపుత్రుడు’ నుంచే. వెంకటేశ్‌ హీరోగా కోడి రామకృష్ణ చేసిన ఈ సాహసం అప్పట్లో బెడిసికొట్టింది. ఇక ఆ తర్వాత మూడేళ్లకు చిరంజీవితో కోడి రామకృష్ణే ‘అంజి’ అని మరో సాహసం చేశారు. అది కూడా డిజాస్టర్‌. ఇక ఆ తర్వాత కొన్నాళ్లు ఎవరూ అలాంటి సినిమాల జోలికి పోలేదు. 2014లో ఓ మోస్తరు హీరో అయిన నిఖిల్‌ ‘కార్తికేయ’ అని ఓ సినిమా చేశారు. దేవుడి నేపథ్యంతో కూడిన ఆ సినిమా బాగా ఆడింది.

ఆరేండ్లు గిర్రున తిరిగాయి. ప్రపంచాన్ని కరోనా కమ్మేసింది. థియేటర్లన్నీ మూతపడ్డాయి. కొన్ని నెలల తర్వాత నిదానంగా థియేటర్లు తెరుచుకున్నాయి. అయితే.. ధైర్యం చేసి ఎవరూ థియేటర్లకు వెళ్లలేని పరిస్థితి. అలాంటి సమయంలో విడుదలైంది.. ‘అఖండ’. బోయపాటి శ్రీను దర్శకత్వంలో బాలకృష్ణ నటించిన ఈ సినిమా ప్రేక్షకుల్ని థియేటర్లకు పరుగులు పెట్టించింది. దేవుడ్ని నామమాత్రంగా చూపిస్తూ.. కేవలం దేవుడి షాడోలో హీరోను నడిపిస్తూ.. ఓ ఆధ్యాత్మిక వాతావరణంలో హీరోని దేవుడి ప్రతినిధిగా ఆవిష్కరిస్తూ హీరోయిజానికి కొత్త భాష్యం చెప్పారు బోయపాటి. అందులో అఘోరాగా కనిపించిన బాలకృష్ణలో సాక్షాత్తు శివుడ్నే చూశారు జనం. ఫలితం బ్లాక్‌బస్టర్‌. ఈ సినిమా తర్వాత హీరోను దేవుడికి ప్రతినిధిగా చూపించే ట్రెండ్‌ మొదలైంది.

సరిగ్గా ‘అఖండ’ వచ్చిన ఏడాదికి కన్నడ డబ్బింగ్‌ ‘కాంతార’ విడుదలైంది. ఇది ఓ రకమైన దేవుడి కథ. కర్ణాటకలోని పింజర్ల సంస్కృతికి అద్దం పట్టిన ఈ సినిమా దేశవ్యాప్తంగా కాసుల వర్షం కురిపించింది. అదే ఏడాది విడుదలైన ‘కార్తికేయ 2’ కూడా ఈ తరహా కథే. శ్రీకృష్ణుడి చుట్టూ తిరిగే ఈ కథ బాలీవుడ్‌లోనూ పెద్ద హిట్‌. రూ.15 కోట్ల బడ్జెట్‌తో రూపొందిన ఈ చిత్రం ప్రపంచవ్యాప్తంగా రూ.122 కోట్లు వసూలు చేసింది. ఈ సినిమాలొచ్చిన రెండేళ్లకు అంటే 2024లో ‘హను-మాన్‌’ విడుదలైంది. ఓ సామాన్యుడి జీవితాన్ని హనుమంతుడితో ముడిపెట్టి రాసుకున్న కథ ఇది. ఇందులో హీరో తేజా సజ్జాని హనుమంతుడి షాడోలో చూపించాడు దర్శకుడు ప్రశాంత్‌వర్మ. ఈ ఒక్క సినిమాతో తేజా సజ్జా సూపర్‌హీరో అయిపోయాడు. రూ.40కోట్ల బడ్జెట్‌తో రూపొందిన ఈ పానిండియా సినిమా రూ.300 కోట్లు వసూలు చేసి దేశమంతా నివ్వెరపోయేలా చేసింది.

ఇక ప్రభాస్‌ ‘కల్కి 2898AD’. ఏకంగా శ్రీ మహావిష్ణువు 10వ అవతారమైన కల్కి ఆగమనాన్ని ముందే ఊహించేసి, తెరకెక్కించేశాడు దర్శకుడు నాగ్‌ అశ్విన్‌. దీనికోసం మనల్ని వందల ఏళ్లు ముందుకు తీసుకెళ్లాడు. భారతంలోని అశ్వత్థామనీ, కర్ణుణ్నీ ఈ కథలో భాగం చేసి తెరపై ఓ మహాద్భుతాన్ని ఆవిష్కరించేశాడు. రూ.600కోట్ల బడ్జెట్‌తో రూపొందిన ఈ సినిమా ప్రపంచవ్యాప్తంగా రూ.1100కోట్లు వసూలు చేసింది.

‘కాంతారా’ సినిమాకు ప్రీక్వెల్‌గా వచ్చిన ‘కాంతార చాప్టర్‌ 1’. ఇటీవలే విడుదలై దాదాపు రూ.900 కోట్లు వసూలు చేయగా, ‘అఖండ’ సీక్వెల్‌ ‘అఖండ: తాండవం’ డిసెంబర్‌ 5న థియేటర్లలోకి రానున్నది. జనవరి నుంచి ‘హను-మాన్‌’ సీక్వెల్‌ ‘జై హనుమాన్‌’ షూటింగ్‌ మొదలు కానుంది. వచ్చే ఏడాది ‘కల్కి 2’ కూడా మొదలు కానున్నట్టు సమాచారం.

ప్రస్తుతం ఈ తరహా సినిమాలకు గిరాకీ ఓ రేంజ్‌లో ఉందని చెప్పొచ్చు. రీసెంట్‌గా విడుదలై విజయాన్ని అందుకున్న ‘మిరాయ్‌’ ఇలాంటి కథే. ఓ సామాన్యుడు యోధుడిగా ఎలా మారాడు? అనేది ఈ సినిమా. మిరాయ్‌లో అంతర్లీనంగా శ్రీరాముడు కనిపిస్తూ.. వినిపిస్తుంటాడు. రాజమౌళి, మహేశ్‌బాబు కాంబినేషన్‌లో రూపొందుతున్న ‘వారణాసి’ కూడా దేవుడి చుట్టూ తిరిగే కథే. ఇందులో రామాయణం ఓ భాగమని రాజమౌళీనే స్వయంగా చెప్పారు. చిరంజీవి కథానాయకుడిగా మల్లిడి వశిష్ఠ దర్శకత్వంలో రూపొందుతున్న ‘విశ్వంభర’ కథ కూడా ఈ కోవకు చెందినదే. ఇందులో చిరంజీవి కారణజన్ముడిగా కనిపిస్తారు. గోదావరి జిల్లాలో ఓ మారుమూల పల్లెటూరిలో పుట్టిన ఓ వ్యక్తి, లోకాలను చుట్టి రావడం. లోకాలను గెలిచి రావడం ఈ సినిమా కథ. అలాగే రీసెంట్‌గా దర్శకుడు చందు మొండేటి ‘వాయుపుత్ర’ సినిమాను ప్రకటించారు. ఈ కథంతా హనుమంతుడి నేపథ్యంలో ఉంటుందని సమాచారం. ప్రశాంత్‌వర్మ యూనివర్స్‌ నుంచి రానున్న ‘మహాకాళి’ సినిమాలో అమ్మవారి నేపథ్యం ఎక్కువగా ఉంటుందట. ‘బలగం’ వేణు ‘ఎల్లమ్మ’ ఓ గ్రామదేవత చుట్టూ తిరిగే కథ.

ఈ విధంగా రానున్న రెండేళ్లలో విడుదల కానున్న డివైన్‌ సినిమాల జాబితా గట్టిగానే ఉంది. మొత్తంగా జనానికి దైవదర్శనం.. మేకర్లకు లక్ష్మీకటాక్షం.. ఈ తరహాగా సాగిపోతున్నది ప్రస్తుతం ట్రెండ్‌. ఎమోషన్‌కి డివైన్‌ని మిక్స్‌ చేసి డివోషన్‌తో ఆడియన్స్‌ని పడేస్తున్నారు నేటి మేకర్స్‌. మరి ఈ ట్రెండ్‌ ఇంకెంతకాలం ఉంటుందో చూడాలి.

– బుర్రా నరసింహ