హీరో రవితేజ నటిస్తున్న సినిమా ‘రామారావు ఆన్ డ్యూటీ’. రజిషా విజయన్, దివ్యాంశ కౌశిక్ నాయికలుగా నటిస్తున్నారు. యథార్థ ఘటనల నేపథ్యంతో యాక్షన్ ఎంటర్టైనర్గా దర్శకుడు శరత్ మండవ ఈ చిత్రాన్ని రూపొందిస్తున్నారు. ఆయనకిది తొలి సినిమా. శ్రీలక్ష్మీ వెంకటేశ్వర సినిమాస్ ఎల్ఎల్పీ, ఆర్టీ టీమ్ వర్క్స్ పతాకాలపై సుధాకర్ చెరుకూరి నిర్మిస్తున్నారు. చిత్రీకరణ పూర్తి చేసుకున్న ఈ సినిమా ప్రస్తుతం నిర్మాణానంతర కార్యక్రమాలు జరుపుకుంటున్నది. జూలై 29న విడుదల చేయబోతున్నారు. తాజాగా ఈ చిత్రం నుంచి మూడో లిరికల్ సాంగ్ ‘నా పేరు సీసా..’ రిలీజ్ చేశారు. ఈ పాటకు చంద్రబోస్ సాహిత్యాన్ని అందించగా సామ్ సీఎస్ స్వరపర్చి శ్రేయా ఘోషల్తో కలిసి పాడారు. ఈ పాటలో రవితేజతో కలిసి స్టెప్పులేసింది అన్వేషి. ఈ మాస్ పాటతో ప్రేక్షకులకు ఫుల్ జోష్ ఖాయమని చిత్ర బృందం చెబుతున్నారు. వేణు తొట్టెంపూడి, నాజర్, నరేష్ వీకే తదితరులు ఇతర పాత్రల్లో నటిస్తున్నారు.