Virata Parvam | పాత్ర నచ్చితే క్యారెక్టర్ ఆర్టిస్టుగా కూడా చేయడానికి సిద్ధంగా ఉండే అతికొద్ది మంది నటులలో రానా దగ్గుబాటి ఒకడు. మొదటి నుంచి విభిన్న కథలను ఎంచుకుంటూ అటు హీరోగా ఇటు క్యారెక్టర్ ఆర్టిస్టుగా సినీరంగంలో తన కంటూ ప్రత్యేక స్థానాన్ని ఏర్పరచుకుంటున్నాడు. ఈ ఏడాది ఫిబ్రవరిలో ఈయన నటించిన ‘భీమ్లానాయక్’ విడుదలై ఘన విజయం సాధించింది. ఇందులో రానా నటనకు ప్రేక్షకులతో పాటు సినీ క్రిటిక్స్ నుంచి మంచి ప్రశంసలు దక్కాయి. అయితే రానా అభిమానులతో పాటు సినీ ప్రేక్షకులు ఎంతగానో ఎదురు చూస్తున్న చిత్రం ‘విరాటపర్వం’. గతేడాది ప్రథమార్థంలో షూటింగ్ పూర్తి చేసుకున్న ఈ చిత్రం కరోనా కారణంగా విడుదల వాయిదా పడుతూ వచ్చింది.
అయితే ఇటీవలే చిత్రబృందం విడుదల తేదీని ప్రకటించింది. ఈ చిత్రం జూన్ 17న ప్రేక్షకుల ముందుకు రానుంది. ఈ క్రమంలో మేకర్స్ తరచూ ఏదో ఒక అప్డేట్ను ప్రకటిస్తున్నారు. తాజాగా ఈ చిత్రం నుంచి ‘నగాదారిలో’ పాటను మేకర్స్ విడుదల చేశారు. ద్యావరి నరేందర్ రెడ్డి, సనపాటి భరద్వాజ్ సాహిత్యం అందించిన ఈ పాటను వరం ఆలపిచింది. సురేష్ బొబ్బిలి స్వర పరిచిన ఈ పాట శ్రోతలను ఆకట్టుకుంటుంది. ఉత్తర తెలంగాణలో 1990లో జరిగిన యదార్థ సంఘటనల ఆధారంగా తెరకెక్కిన ఈ చిత్రానికి ‘నీదినాది ఓకేకథ’ ఫేం వేణు ఊడుగుల దర్శకత్వం వహించాడు. సాయిపల్లవి హీరోయిన్గా నటించిన ఈ చిత్రంలో ప్రియమణి కీలకపాత్రలో నటించింది. ఈ చిత్రాన్ని శ్రీలక్ష్మీ వెంకటేశ్వరా సినిమాస్ బ్యానర్పై సుధాకర్ చెరుకూరి నిర్మించాడు.