Shruti Haasan | ‘ప్రేమ ఎలా మొదలైనా.. దాని స్వభావం ఎలా ఉన్నా.. వదులుకోవడం మాత్రం కష్టం. అది ఎంత అందంగా మొదలవుతుందో.. అంత భయంకరం ముగుస్తుంది. అదొక పోరాటం’ అంటున్నారు నటలోకనాయకుడు కమల్హాసన్. ఆయన కుమార్తె శ్రుతిహాసన్ ‘ఇనిమేల్’ పేరుతో స్పెషల్ సాంగ్స్ని విడుదల చేస్తున్న విషయం తెలిసిందే.
ఇందులో భాగంగా ‘ప్రేమ వారసత్వం’ పేరుతో మరో పాటను శ్రుతి విడుదల చేయనున్నది. ఈ పాటకు కమల్హాసన్ సాహిత్యం అందించడం విశేషం. తండ్రీకూతుళ్ల అనుబంధం నేపథ్యంలో ఈ పాట సాగుతుంది. ఈ సందర్భంగా ఈ తండ్రీకూతుళ్లు ఓ వీడియో విడుదల చేశారు.
ఆ వీడియోలో కమల్, శ్రుతిల మాటలు ఇలా సాగాయి. ‘ సంప్రదాయాలు, సామాజిక పరిస్థితులు నచ్చకపోతే వదిలేశాను. ప్రేమను మాత్రం వదులుకోలేకపోయాను’ అని కమల్ అంటే.. ‘ మానాన్న నన్ను అందరిలా పెంచలేదు. ఆయన ఎమోషన్స్ని బయటకు కనిపించనివ్వరు. చిన్న పిల్లలు తండ్రులతో ఉండే రీల్స్ నాకాయన పంపినప్పుడు నన్ను మిస్ అవుతున్నారని నాకు అర్థమవుతుంది. నేను ఎప్పటికీ నాన్న కూచినే’ అని శ్రుతి చెప్పింది. ప్రస్తుతం ఈ వీడియో ప్రేక్షకులను విశేషంగా ఆకట్టుకుంటున్నది.