Gaayapadda simham | సైలెంట్‌గా ఓటీటీలోకి గాయ‌ప‌డ్డ సింహం .. మూడు వారాల్లోనే ప్రేక్షకుల ముందుకు!

Gaayapadda simham | టాలీవుడ్‌లో తనదైన శైలిలో సినిమాలు రూపొందిస్తూ ప్రత్యేక గుర్తింపు సంపాదించుకున్న దర్శకుడు, నటుడు తరుణ్ భాస్కర్ హీరోగా నటించిన తాజా చిత్రం ‘గాయపడ్డ సింహం’ ఇటీవల ప్రేక్షకుల ముందుకు వచ్చిన సంగతి తెలిసిందే. కొత్త దర్శకుడు కశ్యప్ శ్రీనివాస్ తెరకెక్కించిన ఈ ఆసక్తికర హాస్య ప్రధాన కథా చిత్రం మే 1న థియేటర్లలో విడుదలైంది.

Gaayapadda simham | టాలీవుడ్‌లో తనదైన శైలిలో సినిమాలు రూపొందిస్తూ ప్రత్యేక గుర్తింపు సంపాదించుకున్న దర్శకుడు, నటుడు తరుణ్ భాస్కర్ హీరోగా నటించిన తాజా చిత్రం ‘గాయపడ్డ సింహం’ ఇటీవల ప్రేక్షకుల ముందుకు వచ్చిన సంగతి తెలిసిందే. కొత్త దర్శకుడు కశ్యప్ శ్రీనివాస్ తెరకెక్కించిన ఈ ఆసక్తికర హాస్య ప్రధాన కథా చిత్రం మే 1న థియేటర్లలో విడుదలైంది. విడుదలకు ముందు ప్రచార కార్యక్రమాలతో ఈ చిత్రంపై మంచి ఆసక్తి నెలకొన్నప్పటికీ, విడుదల తర్వాత మాత్రం ప్రేక్షకుల అంచనాలను అందుకోలేకపోయింది. సినిమా ప్రచార కార్యక్రమాల్లో చిత్రబృందం ప్రత్యేక శ్రద్ధ చూపింది. కథలోని వినోదాత్మక అంశాలు, భిన్నమైన ప్రదర్శన శైలి ప్రేక్షకుల్లో ఆసక్తిని పెంచాయి. అయితే తెరపై కథనం ఆశించిన స్థాయిలో ఆకట్టుకోలేకపోవడంతో ప్రేక్షకుల నుంచి మిశ్రమ స్పందన వచ్చింది.

ముఖ్యంగా మే 1న విడుదలైన పలు చిత్రాల పోటీలో ఈ సినిమా కూడా వెనుకబడినట్లు సినీ వర్గాలు అభిప్రాయపడుతున్నాయి. అయితే థియేటర్లలో ఆశించిన ఫలితం రాకపోయినా, ఇప్పుడు ఈ చిత్రానికి డిజిటల్ వేదికపై మరో అవకాశం లభించింది. విడుదలైన మూడు వారాల వ్యవధిలోనే ఈ చిత్రం నిశ్శబ్దంగా ఓటీటీ వేదికలోకి అడుగుపెట్టింది. ప్రముఖ ఓటీటీ వేదిక‌ అమెజాన్ ప్రైమ్ వీడియోలో ఈ చిత్రం ఈ రోజు నుంచి ప్రసారానికి అందుబాటులోకి వచ్చినట్లు తెలుస్తుంది. హాస్యంతో పాటు వ్యంగ్య అంశాలను కలగలిపి రూపొందించిన ఈ చిత్రంలో ప్రముఖ నటుడు జేడీ చక్రవర్తి కూడా కీలక పాత్రలో కనిపించారు. ఆయన పాత్ర సినిమాకు ప్రత్యేక ఆకర్షణగా నిలిచింది అని చెప్ప‌వ‌చ్చు.

తరుణ్ భాస్కర్ తన సహజ నటనతో ప్రేక్షకులను అలరించే ప్రయత్నం చేసినప్పటికీ, కథలో బలమైన అంశాలు లేకపోవడం సినిమాపై ప్రభావం చూపిందని అభిప్రాయాలు వ్యక్తమయ్యాయి. సప్త అశ్వ మీడియా వర్క్స్, జీ స్టూడియోస్ సంయుక్తంగా నిర్మించిన ఈ చిత్రానికి ఇప్పుడు డిజిటల్ వేదికపై ఎలాంటి స్పందన లభిస్తుందో చూడాలి. థియేటర్లలో మిస్ అయిన ప్రేక్షకులు ఇప్పుడు ఇంట్లోనే ఈ హాస్య కథా చిత్రాన్ని వీక్షించే అవకాశం పొందుతున్నారు.