Venky Atluri | ఆయనతో పోల్చడం గౌరవంగా భావిస్తున్నా

‘తొలిప్రేమ’తో ప్రేక్షకుల ప్రేమను గెలుచుకొని.. సర్‌, లక్కీభాస్కర్‌ విజయాలతో తెలుగుతోపాటు తమిళ, మలయాళ ప్రేక్షకుల మన్ననలను కూడా పొందారు దర్శకుడు వెంకీ అట్లూరి. రీసెంట్‌గా ‘విశ్వనాథ్‌ అండ్‌ సన్స్‌' లాంటి డీసెంట్‌ లవ్‌స్టోరీతో దక్షిణాది సినీరంగంలో మరోసారి దర్శకునిగా విజయకేతనం ఎగురవేశారాయన.

‘తొలిప్రేమ’తో ప్రేక్షకుల ప్రేమను గెలుచుకొని.. సర్‌, లక్కీభాస్కర్‌ విజయాలతో తెలుగుతోపాటు తమిళ, మలయాళ ప్రేక్షకుల మన్ననలను కూడా పొందారు దర్శకుడు వెంకీ అట్లూరి. రీసెంట్‌గా ‘విశ్వనాథ్‌ అండ్‌ సన్స్‌’ లాంటి డీసెంట్‌ లవ్‌స్టోరీతో దక్షిణాది సినీరంగంలో మరోసారి దర్శకునిగా విజయకేతనం ఎగురవేశారాయన. సూర్య, మమితాబైజు జంటగా వెంకీ అట్లూరి దర్శకత్వంలో, సూర్యదేవర నాగవంశీ, సాయిసౌజన్య నిర్మించిన ఈ చిత్రం వసూళ్ల పరంగా 200కోట్ల మైలురాయికి చేరువవుతూ.. తెలుగు, తమిళ రాష్ర్టాల్లో విజయవంతంగా దూసుకుపోతున్నది. ఈ సందర్భంగా గురువారం వెంకీ అట్లూరి హైదరాబాద్‌లో విలేకరులతో ముచ్చటించారు.

ఈ కథను 2022లో రాశా. ఇది సూర్యని దృష్టిలో పెట్టుకొని రాసిన కథ కాదు. ముందు నిర్మాతలు ఓకే చేశారు. హీరో కోసం వెతుకుతున్న తరుణంలో సూర్య మంచి ఫ్యామిలీ స్టోరీ కోసం చూస్తున్నారన్న విషయం తెలిసింది. దాంతో ఈ కథ ఆయనకు వినిపించాం. సూర్యకు కథ నచ్చడంతో ఆయన శారీరక భాషకు తగ్గట్టుగా కొన్ని మార్పులు చేయడం జరిగింది. అనవసరపు కామెడీ, అక్కర్లేని కమర్షియల్‌ అంశాలూ లేకుండా నిజాయితీ ఈ కథను చెబుదామని సూర్య చెప్పారు. ఆయన చెప్పినట్టే నిజాయితీగా సినిమా తీశాం. ముఖ్యంగా ైక్లెమాక్స్‌ విషయంలో జాగ్రత్తలు తీసుకున్నాం. కథలోని ఏ పాత్ర పడిపోకుండా జాగ్రత్త పడ్డాం. విడుదలకు కొద్ది రోజుల ముందే సూర్య సినిమా చూశారు. తాను ఏదైతే నమ్మారో, అదే తెరపై కనిపించిందని ఆయన సంతోషపడ్డారు.

వయసు వ్యాత్యాసం ఉన్న బంధంపై కథ రాయాలని ముందు అనుకున్నాను. 40ఏండ్లు వచ్చినా హీరో పెళ్లి చేసుకోలేదంటే దానికి బలమైన కారణం ఉండాలి. కారణం దొరికింది. దాని చుట్టూ కథ అల్లాను. నా దృష్టిలో మనుషులెవరూ చెడ్డవారు కాదు. పరిస్థితుల వల్ల ఒక్కొక్కరూ ఒక్కోలా ప్రవర్తిస్తుంటారు. అదే విషయాన్ని ఈ సినిమాలో చెప్పాను. తెలుగుతోపాటు తమిళంలోనూ ఈ సినిమాకు మంచి స్పందన వస్తున్నది. ఇక్కడ కంటే తమిళంలో సినిమాకు లాంగ్విటీ ఎక్కువ ఉంటుంది. ఆ విధంగా చూసుకుంటే తమిళనాట ‘విశ్వనాథన్‌ అండ్‌ సన్స్‌’ చాలా పెద్ద హిట్‌.

సినిమాల్లోకి రావడానికి నాకు స్ఫూర్తి మణిరత్నం, త్రివిక్రమ్‌. ఈ సినిమాలోని నా రైటింగ్‌ చూసిన వారంతా త్రివిక్రమ్‌గారితో పోలుస్తున్నారు. ఇది గౌరవంగా భావిస్తున్నా. ఈ సినిమా నిర్మాణంలో ఆయన కూడా భాగస్వామే. సితార సంస్థలోని ప్రతి సినిమానూ ఆయన చూస్తారు. చిన్నచిన్న మార్పులు చేర్పులు సూచిస్తారు. కానీ ఈ సినిమా విషయంలో మాత్రం ఆయన ఎలాంటి మార్పులు చెప్పలేదు. సినిమా అనేది ఎడిట్‌ టేబుల్‌పై బెటర్‌ అవుతుంది. ఎడిటర్‌కి స్వేచ్ఛ ఇస్తే, ఖచ్ఛితంగా మంచి అవుట్‌పుట్‌ వస్తుంది. ‘విశ్వనాథ్‌ అండ్‌ సన్స్‌’ విషయంలో అదే జరిగింది. త్వరలో సితార సంస్థలోనే మరో సినిమా చేయబోతున్నా. ఆ వివరాలు త్వరలో చెబుతా.