పదో తరగతి జ్ఞాపకాల్లో

శ్రీరామ్‌, అవికాగోర్‌ జంటగా నటిస్తున్న సినిమా ‘10 క్లాస్‌ డైరీస్‌’. ఈ చిత్రాన్ని అజయ్‌ మైసూర్‌ సమర్పణలో అచ్యుత రామారావు, పి. రవితేజ మన్యం సంయుక్తంగా నిర్మించారు. ‘గరుడవేగ’ అంజి దర్శకుడు. జూలై 1న ఈ సినిమా విడుదలకు సిద్ధమవుతున్నది. తాజాగా జరిగిన కార్యక్రమంలో చిత్ర విశేషాలు తెలిపారు దర్శకుడు అంజి. ఆయన మాట్లాడుతూ.. ‘సినిమాటోగ్రాఫర్‌గా ఇది నాకు 50వ సినిమా. ‘గరుడ వేగ’ సినిమా నాకు మంచి పేరు తీసుకొచ్చింది. కెరీర్‌లో చాలా మంది దర్శకులతో కలిసి పనిచేసిన అనుభవంతో దర్శకుడిగా అడుగువేశాను. ఈ సినిమాతో పాటు ‘బుజ్జీ ఇలా రా’ అనే చిత్రాన్నీ తెరకెక్కించాను. లాక్‌డౌన్‌ వల్ల ఈ రెండు సినిమాలు విడుదల ఆలస్యమయ్యాయి. ‘10 క్లాస్‌ డైరీస్‌’ విషయానికొస్తే కొన్నేళ్ల తర్వాత తిరిగి కలుసుకున్న పదో తరగతి విద్యార్థుల కథ ఇది. వినోదం, భావోద్వేగాల కలయికగా తెరకెక్కించాం.

ఈ కథలో శ్రీరామ్‌, అవికా ఇలా..ఎవరెవరు నటించాలని కోరుకున్నామో వాళ్లంతా సినిమాకు అంగీకరించి నటించారు. మానసికంగా పరిణితి చెందిన వ్యక్తి పాత్రలో శ్రీరామ్‌ కనిపిస్తారు. పక్కింటి అమ్మాయి అనిపించేలా అవికా గోర్‌ క్యారెక్టర్‌ ఉంటుంది. ‘చిన్నారి పెళ్లి కూతురు’ సీరియల్‌ నుంచి ఆమె మన తెలుగు ప్రేక్షకులకు తెలుసు. ఈ ఇమేజ్‌ కోసమే ఆమెను తీసుకున్నాం. రీయూనియన్‌కు అంతా వస్తారు కానీ ఒక అమ్మాయి రాదు. ఆమే గతంలో హీరో ప్రేమించిన అమ్మాయి. ఆమె ఎక్కడుంది, ఎలా ఉందని తెలుసుకునే ప్రయత్నం ప్రారంభిస్తారు. సినిమాలో ఈ అంశం సస్పెన్స్‌గా ఉంటుంది. సినిమాటోగ్రాఫర్‌ను కాబట్టి విజువల్స్‌ కోసం ఆరాటపడలేదు. కథను బలంగా చెప్పే ప్రయత్నం చేశాం. మా సినిమాకు హీరో ధనుష్‌, నిఖిల్‌..ఇలాంటి వాళ్లంతా ఎంతో సపోర్ట్‌ చేశారు. వాళ్లందరికీ కృతజ్ఞతలు. ఇకపైనా సినిమాటోగ్రాఫర్‌గా కొనసాగుతాను. మంచి కథ కుదిరితే దర్శకత్వం వహిస్తా’ అన్నారు.