సెన్సెక్స్‌ @ 1,00,000!

దేశీయ స్టాక్‌ మార్కెట్లలో నష్టాలకు ఇక తెరపడినట్టేనని అంతర్జాతీయ ఆర్థిక సేవల దిగ్గజ సంస్థ మోర్గాన్‌ స్టాన్లీ అంటున్నది. ఈ క్రమంలోనే వచ్చే ఏడాది జూన్‌కల్లా బాంబే స్టాక్‌ ఎక్సేంజ్‌ (బీఎస్‌ఈ) ప్రధాన సూచీ సెన్సెక్స్‌ లక్ష పాయింట్ల మార్కును చేరగలదన్న విశ్వాసాన్నీ వ్యక్తం చేస్తుండటం గమనార్హం.

• వచ్చే ఏడాది జూన్‌కల్లా చేరుకోవచ్చంటున్న మోర్గాన్‌ స్టాన్లీ

ముంబై, నవంబర్‌ 5: దేశీయ స్టాక్‌ మార్కెట్లలో నష్టాలకు ఇక తెరపడినట్టేనని అంతర్జాతీయ ఆర్థిక సేవల దిగ్గజ సంస్థ మోర్గాన్‌ స్టాన్లీ అంటున్నది. ఈ క్రమంలోనే వచ్చే ఏడాది జూన్‌కల్లా బాంబే స్టాక్‌ ఎక్సేంజ్‌ (బీఎస్‌ఈ) ప్రధాన సూచీ సెన్సెక్స్‌ లక్ష పాయింట్ల మార్కును చేరగలదన్న విశ్వాసాన్నీ వ్యక్తం చేస్తుండటం గమనార్హం. ప్రస్తుతం 83,459.15 పాయింట్ల వద్ద ఉన్న సెన్సెక్స్‌.. మరో 8 నెలల్లో 16,500 పాయింట్లకుపైగా పుంజుకోగలదని మోర్గాన్‌ స్టాన్లీ చెప్తున్నది. నిజానికి గత ఏడాది సెప్టెంబర్‌ 26న సెన్సెక్స్‌ ఆల్‌టైమ్‌ హై రికార్డును నెలకొల్పింది. మునుపెన్నడూ లేనివిధంగా 85,836.12 పాయింట్లకు చేరింది. అయితే ఆ తర్వాత తీవ్ర ఒడిదొడుకుల నడుమ ఏడాది గడిచిపోయినా మళ్లీ ఆ మార్కును మాత్రం సూచీ తాకలేకపోయింది. ఈ నేపథ్యంలో మోర్గాన్‌ స్టాన్లీ అంచనాలు మిక్కిలి ప్రాధాన్యతను సంతరించుకుంటున్నాయి.

ఈ షేర్లకు గిరాకీ

మారుతీ సుజుకీ, ట్రెంట్‌, టైటాన్‌ కంపెనీ, వరుణ్‌ బేవరేజెస్‌, రిలయన్స్‌ ఇండస్ట్రీస్‌, బజాజ్‌ ఫైనాన్స్‌, ఐసీఐసీఐ బ్యాంక్‌, ఎల్‌అండ్‌టీ, అల్ట్రాటెక్‌ సిమెంట్‌, కోఫోర్జ్‌ షేర్లు మోర్గాన్‌ స్టాన్లీ టాప్‌-10 ఇండియన్‌ ఓవర్‌వెయిట్‌ షేర్లలో ఉన్నాయి. ఈ షేర్లకు మున్ముందు మదుపరుల నుంచి మంచి కొనుగోళ్ల మద్దతు లభించవచ్చని మోర్గాన్‌ పేర్కొన్నది. ఇక ద్రవ్యోల్బణం అదుపులోనే ఉండటం, రిజర్వ్‌ బ్యాంక్‌ ఆఫ్‌ ఇండియా (ఆర్బీఐ) వడ్డీరేట్లను తగ్గించడం, నగదు నిల్వల నిష్పత్తి (సీఆర్‌ఆర్‌)కి కూడా కోతలు పెట్టడం, వస్తు, సేవల పన్ను (జీఎస్టీ) రేట్లను కేంద్ర ప్రభుత్వం మరింత సరళతరం చేయడం వంటివి మార్కెట్‌ సెంటిమెంట్‌ను బలోపేతం చేస్తాయని మోర్గాన్‌ స్టాన్లీ భారతీయ ఈక్విటీ ప్రధాన వ్యూహకర్త, ఎండీ రిధమ్‌ దేశాయ్‌ అంటున్నారు. అలాగే అమెరికాతో భారత్‌ వాణిజ్య ఒప్పందం కుదుర్చుకుంటే.. ఇక్కడి స్టాక్‌ మార్కెట్లకు పెద్ద ఎత్తున ఉత్సాహం లభించగలదని అభిప్రాయపడ్డారు.

రిస్క్‌ లేకపోలేదు

ప్రపంచ ఆర్థిక వ్యవస్థలో మందగమనం, భౌగోళిక-రాజకీయ ఉద్రిక్తతలు పెరగడం వంటివి భారత జీడీపీ, స్టాక్‌ మార్కెట్లకు ఇబ్బందికర పరిస్థితులను తెచ్చిపెట్టే వీలుందని మోర్గాన్‌ స్టాన్లీ ఈ సందర్భంగా అభిప్రాయపడింది. అయితే రాబోయే ద్రవ్యసమీక్షల్లో ఆర్బీఐ రెపోరేటును ఇంకా తగ్గిస్తే, భారత్‌పై అమెరికా సుంకాలు తగ్గుముఖం పడితే.. పరిస్థితులు మెరుగయ్యే వీలుందన్నది. ఇక భారతీయ మార్కెట్ల నుంచి విదేశీ పోర్ట్‌ఫోలియో మదుపరులు (ఎఫ్‌పీఐ) పెట్టుబడులను వెనక్కి తీసుకుంటుండటం ఒకింత కలవరపాటు అంశమేనని పేర్కొన్నది. ఎఫ్‌పీఐల నుంచి పెట్టుబడులు వస్తే సూచీలు పెద్ద ఎత్తున పరుగులు పెట్టడం ఖాయమన్నది.