పాలసీల పునరుద్ధరణకు ఎల్‌ఐసీ ఆఫర్‌

ప్రభుత్వ రంగ జీవిత బీమా దిగ్గజం, లైఫ్‌ ఇన్సూరెన్స్‌ కార్పొరేషన్‌ (ఎల్‌ఐసీ) తమ పాలసీదారులకు శుక్రవారం ఓ స్పెషల్‌ ఆఫర్‌ ఇచ్చింది. ఆగిపోయిన వ్యక్తిగత పాలసీల పునరుద్ధరణకు అవకాశం కల్పించింది. 2 నెలలపాటు ఈ ప్రత్యేక కార్యక్రమం కొనసాగనున్నది.

న్యూఢిల్లీ, జనవరి 2 : ప్రభుత్వ రంగ జీవిత బీమా దిగ్గజం, లైఫ్‌ ఇన్సూరెన్స్‌ కార్పొరేషన్‌ (ఎల్‌ఐసీ) తమ పాలసీదారులకు శుక్రవారం ఓ స్పెషల్‌ ఆఫర్‌ ఇచ్చింది. ఆగిపోయిన వ్యక్తిగత పాలసీల పునరుద్ధరణకు అవకాశం కల్పించింది. 2 నెలలపాటు ఈ ప్రత్యేక కార్యక్రమం కొనసాగనున్నది. మార్చి 2దాకా అన్ని నాన్‌-లింక్డ్‌ లాప్స్‌డ్‌ పాలసీలకు ఆలస్య రుసుములో ఆకర్షణీయ రాయితీతో ఈ సదుపాయం అందుబాటులో ఉంటుంది.

సదరు బీమా ప్లాన్లకు అర్హత ఉంటే లేట్‌ ఫీజులో గరిష్ఠంగా రూ.5వేలు లేదా 30 శాతం వరకు తగ్గింపును పొందవచ్చని ఓ ప్రకటనలో ఎల్‌ఐసీ తెలిపింది. కాగా, మైక్రో ఇన్సూరెన్స్‌ పాలసీల కోసం ఆలస్య రుసుమును సంస్థ పూర్తిగా ఎత్తేసింది. అయితే మెడికల్‌/ఆరోగ్య అవసరాలపై మాత్రం ఎలాంటి రాయితీలు ఉండవని ఎల్‌ఐసీ స్పష్టం చేసింది. పాలసీదారుల ప్రయోజనాలను దృష్టిలో పెట్టుకొని తెచ్చిన ఈ సదవకాశాన్ని అర్హులందరూ వినియోగించుకోవాలన్నది. ప్రతికూల పరిస్థితుల కారణంగా ప్రీమియంలు సకాలంలో చెల్లించలేక ఆగిపోయిన పాలసీలకు చక్కని అవకాశంగా ఎల్‌ఐసీ ఈ సందర్భంగా పేర్కొన్నది.