ఆగని పసిడి పతనం
దాదాపు 10 నెలల కిందట ఆకాశమే హద్దుగా దూసుకుపోయిన బంగారం, వెండి ధరలు.. ఇప్పుడు అంతే వేగంగా దిగొస్తున్నాయి. ముఖ్యంగా ఈ నెలలో గోల్డ్, సిల్వర్ రేట్లు అంతకంతకూ పడిపోతున్నాయి. గడిచిన 8 రోజుల్లో పుత్తడి విలువ రూ.12,400 క్షీణించింది. గురువారం మరో రూ.1,300 తగ్గి ఢిల్లీలో 24 క్యారెట్ (99.9 స్వచ్ఛత) 10 గ్రాముల పసిడి ధర రూ.1,34,500 (అన్ని పన్నులు సహా) వద్ద స్థిరపడింది. ఈ నెల 9న తులం రూ.1,46, 900 పలికిన విషయం తెలిసిందే.
- 8 రోజుల్లో రూ.12,400 తగ్గిన ధర
- రూ.1,62,000కు పడిపోయిన వెండి రేటు
న్యూఢిల్లీ, నవంబర్ 19: దాదాపు 10 నెలల కిందట ఆకాశమే హద్దుగా దూసుకుపోయిన బంగారం, వెండి ధరలు.. ఇప్పుడు అంతే వేగంగా దిగొస్తున్నాయి. ముఖ్యంగా ఈ నెలలో గోల్డ్, సిల్వర్ రేట్లు అంతకంతకూ పడిపోతున్నాయి. గడిచిన 8 రోజుల్లో పుత్తడి విలువ రూ.12,400 క్షీణించింది. గురువారం మరో రూ.1,300 తగ్గి ఢిల్లీలో 24 క్యారెట్ (99.9 స్వచ్ఛత) 10 గ్రాముల పసిడి ధర రూ.1,34,500 (అన్ని పన్నులు సహా) వద్ద స్థిరపడింది. ఈ నెల 9న తులం రూ.1,46, 900 పలికిన విషయం తెలిసిందే. ఇక వెండి ధర రూ.1,62,000 (అన్ని పన్నులు సహా)కు పరిమితమైంది. బుధవారం ముగింపుతో పోల్చితే రూ.2,500 దిగింది. హైదరాబాద్లో 22 క్యారెట్ (99.5 స్వచ్ఛత) తులం బంగారం విలువ రూ.2,350 తగ్గి రూ.1,19,800గా నమోదైంది.
అంతర్జాతీయంగా..
గ్లోబల్ మార్కెట్లో ఔన్స్ బంగారం రేటు 3,717.57 డాలర్లకు, సిల్వర్ 44.92 డాలర్లకు దిగింది. అక్టోబర్ ఫెడ్ రిజర్వ్ ద్రవ్య సమీక్షలో సభ్యులు చర్చించిన అంశాలు, అభిప్రాయాలు తాజాగా విడుదలయ్యాయి. ఈ సందర్భంగా వచ్చే ద్రవ్య సమీక్షల్లో వడ్డీరేట్ల పెంపునకు మెజారిటీ సభ్యులు అంగీకారం తెలుపడం కూడా మార్కెట్లో డౌన్ ట్రెండ్కు కారణమైంది. డిసెంబర్లో పావు శాతం (25 బేసిస్ పాయింట్లు) వడ్డీరేట్లను పెంచవచ్చని చెప్తున్నారు.
మరింతగా క్షీణత..
దేశ, విదేశీ మార్కెట్లలో ప్రస్తుత పరిస్థితులను చూస్తుంటే.. పసిడి, వెండి ధరలు ఇంకా పడిపోవచ్చనే మెజారిటీ ఎక్స్పర్ట్స్ అభిప్రాయపడుతున్నారు. ఫారెక్స్ మార్కెట్లో డాలర్తో పోల్చితే బలపడుతున్న రూపాయి మారకం విలువ, ద్రవ్యోల్బణం కట్టడికి అమెరికా ఫెడరల్ రిజర్వ్ బ్యాంక్ రాబోయే ద్రవ్య సమీక్షల్లో కీలక వడ్డీరేట్లను పెంచుతుందన్న అంచనాలు వంటివి గోల్డ్ మార్కెట్ను కుదిపేస్తున్నాయి. ఫెడ్ వడ్డింపులతో అమెరికన్ బాండ్లలో పెట్టుబడులు ఆకర్షణీయంగా మారుతుండటంతో.. ఇన్వెస్టర్లు గోల్డ్ ఇన్వెస్ట్మెంట్స్పట్ల పెద్దగా ఆసక్తి చూపలేకపోతున్నారు. తగ్గే డిమాండ్.. అంతిమంగా ధరల క్షీణతకు దారితీస్తున్నదని మార్కెట్ నిపుణులు తాజా ట్రెండ్ను విశ్లేషిస్తున్నారు. మరోవైపు పారిశ్రామిక వర్గాల నుంచి ఆదరణ లేక వెండి రేట్లు పడిపోతున్నాయి. వివిధ వస్తూత్పత్తుల తయారీలో వెండి వాడకం తగ్గడం, ప్రత్యామ్నాయాలను వినియోగిస్తుండటం, మార్కెట్లో అమ్మకాలు లేక ఆయా వస్తువుల ఉత్పాదకత క్షీణించడం వంటివి సిల్వర్ రేట్లను దించేస్తున్నాయి.
నిపుణుల మాటేంటి?
గోల్డ్ మార్కెట్లో ప్రస్తుతం నెలకొన్న డౌన్ ట్రెండ్ నేపథ్యంలో సాంకేతికంగా 3,707 డాలర్ల వద్ద బంగారానికి మదుపర్ల నుంచి కొనుగోలు మద్దతు లభించవచ్చన్న అభిప్రాయాలు వ్యక్తమవుతున్నాయి. ఆ తర్వాత 3,678 డాలర్ల వద్ద మళ్లీ ఉంటుందని చెప్తున్నారు. అయితే 3,755 డాలర్ల దిగువన ఉన్నంతవరకు స్వల్పంగా బేరిష్ ట్రెండ్ కొనసాగుతుందని అంచనా వేస్తున్నారు. అయితే ఆ స్థాయి ఎగువన ముగిస్తే 3,791 డాలర్ల దిశగా వెళ్లవచ్చని పేర్కొంటున్నారు. ఇక వెండికి ఇప్పుడున్న బేరిష్ ట్రెండ్ మున్ముందూ కొనసాగుతుందని, 42 డాలర్ల వద్ద కొనుగోళ్ల మద్దతు ఉండవచ్చని, దానికి దిగువన 38 డాలర్ల వద్ద మరోసారి మద్దతు లభించవచ్చని పేర్కొన్నారు. మొత్తానికి ఫెడ్ రిజర్వ్ నిర్ణయాలు, బాండ్ మార్కెట్నుబట్టి ట్రెండ్ మారుతూ ఉంటుందని స్పష్టం చేశారు.

Read Today's Latest Business News in Telugu and Telugu News
RELATED ARTICLES
తాజా వార్తలు
ట్రెండింగ్ వార్తలు
Vande Bharat Train | బంధువులను సాగనంపేందుకు వందే భారత్ రైలు ఎక్కిన 12 మంది.. తర్వాత ఏం జరిగిందంటే?
Watch: హాస్పిటల్ యజమానిని బెదిరించి రూ.10 లక్షలు వసూలు.. కాంగ్రెస్ నేత అరెస్ట్, పార్టీ నుంచి బహిష్కరణ
Watch: ‘బ్యాగ్లో గంజాయి పెడతా.. డ్రగ్స్ కేసులో ఇరికిస్తా’.. జంటను బెదిరించిన పోలీస్ అధికారి
Migratory birds | చిలికా సరస్సుకు ప్రత్యేక అతిథులు.. ఏకంగా 80 జాతుల వలసపక్షుల సందడి.. Video
China flies electric plane | 19 సీట్ల ఎలక్ట్రిక్ విమానం.. విజయవంతంగా నడిపి పరీక్షించిన చైనా

