హైదరాబాద్‌లో మార్స్‌ జీసీసీ

హైదరాబాద్‌లో స్నికర్స్‌, పెడిగ్రీ, రాయల్‌ కానిన్‌ తదితర ప్రముఖ బ్రాండ్లతో ప్రపంచవ్యాప్తంగా గుర్తింపు పొందిన మార్స్‌ సంస్థ తన గ్లోబల్‌ కెపాబిలిటీ సెంటర్‌(జీసీసీ)ను ఏర్పాటు చేసింది.

హైదరాబాద్‌, నవంబర్‌ 12 (నమస్తే తెలంగాణ): హైదరాబాద్‌లో స్నికర్స్‌, పెడిగ్రీ, రాయల్‌ కానిన్‌ తదితర ప్రముఖ బ్రాండ్లతో ప్రపంచవ్యాప్తంగా గుర్తింపు పొందిన మార్స్‌ సంస్థ తన గ్లోబల్‌ కెపాబిలిటీ సెంటర్‌(జీసీసీ)ను ఏర్పాటు చేసింది. గచ్చిబౌలి ఫైనాన్షియల్‌ డిస్ట్రిక్ట్‌లో 60 వేల చదరపు అడుగుల విస్తీర్ణంలో అభివృద్ధి చేసిన ఈ జీసీసీని రాష్ట్ర ఐటీ, పరిశ్రమల శాఖల మంత్రి దుద్దిళ్ళ శ్రీధర్‌ బాబు గురువారం ప్రారంభించారు. అనంతరం ఆయన మాట్లాడుతూ… తెలంగాణ ఆర్థిక ప్రగతికి జీసీసీలు కీలక చోదక శక్తులుగా తీర్చిదిద్దేందుకు ప్రణాళికాబద్ధంగా కృషి చేస్తున్నట్టు తెలిపారు.

కొత్త టెక్నాలజీ అభివృద్ధి, ఆర్‌అండ్‌ డీ, డాటా అనలిటిక్స్‌, ప్రొడక్ట్‌ డిజైన్‌, ఇంజినీరింగ్‌, ఇన్నోవేషన్‌ తదితర విభాగాల్లోనూ కీలక పాత్ర పోషించేలా వాటికి మార్గనిర్దేశం చేస్తున్నట్టు చెప్పారు. హైదరాబాద్‌ను సంప్రదాయ ఐటీ సేవల కేంద్రం నుంచి ప్రపంచస్థాయి టెక్నాలజీ, ఇన్నోవేషన్‌, నాలెడ్జ్‌ ఆధారిత ఆర్థిక వ్యవస్థగా అభివృద్ధి చేసేందుకు చిత్తశుద్ధితో కృషి చేస్తున్నామన్నారు. కొత్త రంగాల్లో పెట్టుబడులను ఆకర్షించేందుకు, ఉద్యోగ అవకాశాలను పెంపొందించేందుకు ఐటీ/ఐటీఈఎస్‌ రంగాల్లో హైదరాబాద్‌కు ఉన్న అనుకూలతలను ఇతర పరిశ్రమలతో అనుసంధానించడంపై ప్రత్యేకంగా దృష్టి సారించినట్టు వివరించారు.

జెన్‌పాక్ట్‌ సహకారంతో ఏర్పాటైన ఈ కేంద్రంలో ప్రస్తుతం 400 మందికి పైగా ఉపాధి లభించనుందని, రాబోయే రోజుల్లో ఈ సంఖ్యను వెయ్యికి పెంచుకోనున్నట్టు కంపెనీ చీఫ్‌ ఫైనాన్షియల్‌ అధికారి క్లౌస్‌ ఆగార్డ్‌ తెలిపారు. అంతర్జాతీయ వ్యాపార విస్తరణకు అవసరమైన డిజిటల్‌, డాటా, ఏఐ సామర్థ్యాలను ఈ జీసీసీతో మరింత బలోపేతం కానున్నదన్నారు. దీంతోపాటు హైదరాబాద్‌లో 55 మిలియన్‌ డాలర్ల పెట్టుబడితో పెంపుడు జంతువుల పోషణ ఫ్యాక్టరీని ఏర్పాటు చేయబోతున్నట్టు ఇప్పటికే ప్రకటించింది.