ముంబై, జూలై 15: దేశంలో విదేశీ మారకపు నిల్వలు భారీగా పడిపోతున్నాయి. ఈ నెల 8తో ముగిసిన వారం రోజుల్లో ఫారెక్స్ రిజర్వులు మరో 8.062 బిలియన్ డాలర్లు దిగజారాయి. దీంతో మొత్తం 580.252 బిలియన్ డాలర్లకు తగ్గినట్టు రిజర్వ్ బ్యాంక్ ఆఫ్ ఇండియా (ఆర్బీఐ) శుక్రవారం తెలియజేసింది. జూలై 1తో ముగిసిన అంతకుముందు వారంలోనూ ఫారెక్స్ నిల్వలు 5.008 బిలియన్ డాలర్లు క్షీణించిన విషయం తెలిసిందే. కాగా, ఫారిన్ కరెన్సీ అసెట్స్ (ఎఫ్సీఏ)ల్లో పతనమే ఈ తరుగుదలకు ప్రధాన కారణంగా నిలుస్తున్నట్టు ఆర్బీఐ చెప్పింది. దేశీయ ఫారెక్స్ నిల్వల్లో ఎఫ్సీఏల వాటానే ఎక్కువ. తాజాగా క్షీణించిన రిజర్వుల్లో 6.656 బిలియన్ డాలర్లు ఎఫ్సీఏనే. ఇక మిగిలిన మొత్తం ఫారెక్స్ రిజర్వు (580.252 బిలియన్ డాలర్లు)ల్లో 518.089 బిలియన్ డాలర్లు ఎఫ్సీఏలే. కాగా, బంగారం రిజర్వులు 1.236 బిలియన్ డాలర్లు తగ్గి 39.186 బిలియన్ డాలర్లను తాకాయి.