TTD Key Decision | టీటీడీ కీలక నిర్ణయం.. భక్తుల అభిప్రాయాల కోసం కొత్త వాట్సాప్ ఫీడ్‌బ్యాక్ విధానం

TTD Key Decision | భక్తులకు మెరుగైన సేవలు అందించేందుకు టీటీడీ ఓ కొత్త ఫీడ్‌బ్యాక్ విధానాన్ని ప్రవేశపెట్టింది.

తిరుమల : భక్తులకు మెరుగైన సేవలు అందించేందుకు టీటీడీ( TTD ) ఓ కొత్త ఫీడ్‌బ్యాక్( Feed back ) విధానాన్ని ప్రవేశపెట్టింది. ఇకపై భక్తులు తమ అభిప్రాయాన్ని వాట్సాప్‌ ( Whatapp ) ద్వారా సులభంగా తెలియజేసేందుకు తిరుమల, తిరుపతిలో పలు ప్రాంతాల్లో ఏర్పాటు చేసిన క్యూఆర్ కోడ్‌లను ఏర్పాటు చేసింది. మొబైల్‌తో స్కాన్ చేస్తే వాట్సాప్‌లో టీటీడీ అభిప్రాయ సేకరణ పేజీ ఓపెన్ అవుతుందని అధికారులు వివరించారు.

భక్తులు తమ పేరును నమోదు చేసి అన్నప్రసాదం, శుభ్రత, కల్యాణకట్ట, లడ్డూ ప్రసాదం, లగేజీ, దర్శన అనుభవం, క్యూలైన్, గదులు మొదలై వాటిని ఎంచుకోని అభిప్రాయం తెలిపేందుకు టెక్స్ట్ లేదా వీడియో ఫార్మాట్ ను ఎంచుకోవచ్చని తెలిపారు. సేవా ప్రమాణాన్ని ఎంచుకుని ఉత్తమం, సగటు, మరింత మెరుగుదల అవసరం, లేదా బాగాలేదు గా రేట్ చేయాల్సి ఉంటుందని వెల్లడించారు.

భక్తులు తమ అభిప్రాయాన్ని గరిష్టంగా 600 అక్షరాల పరిమితిలో టైప్ చేయవచ్చని, లేదా వీడియోగా అప్‌లోడ్ చేయవచ్చని సూచించారు. అభిప్రాయం సమర్పించిన వెంటనే, మీ అభిప్రాయం విజయవంతంగా నమోదు చేయబడింది. మీ విలువైన ఫీడ్‌బ్యాక్‌కు ధన్యవాదాలు అనే ధృవీకరణ సందేశం వస్తుందని తెలిపారు. భక్తుల నుండి అందిన అభిప్రాయాలను టీటీడీ యాజమాన్యం పరిగణనలోకి తీసుకుని సేవల ప్రమాణాన్ని పెంచేందుకు తగిన చర్యలు తీసుకుంటుందని స్పష్టం చేశారు.