పురుగుల బెడద.. తప్పించేదెలా?

దానిమ్మ సాగులో చీడపీడల బెడద ఎక్కువగానే ఉంటుంది. సరైన సమయంలో సస్యరక్షణ చర్యలు చేపట్టకుంటే.. తీవ్రంగా నష్టపోయే ప్రమాదం ఉంటుంది. కాయ తొలిచే పురుగు: ఇది దానిమ్మ పండ్లకు తీవ్రనష్టం కలుగజేస్తుంది. ఒక్కోసారి 50 శాతానికి పైగా దిగుబడిని కోల్పోవాల్సి వస్తుంది.

పదెకరాల్లో దానిమ్మ సాగు చేస్తున్నా. కొన్ని రోజులుగా చేనులో పురుగుల బెడద ఎక్కువగా కనిపిస్తున్నది. నివారణ మార్గాలు చెప్పండి.

-సీహెచ్‌ స్వామి, చొప్పదండి.

దానిమ్మ సాగులో చీడపీడల బెడద ఎక్కువగానే ఉంటుంది. సరైన సమయంలో సస్యరక్షణ చర్యలు చేపట్టకుంటే.. తీవ్రంగా నష్టపోయే ప్రమాదం ఉంటుంది.

కాయ తొలిచే పురుగు: ఇది దానిమ్మ పండ్లకు తీవ్రనష్టం కలుగజేస్తుంది. ఒక్కోసారి 50 శాతానికి పైగా దిగుబడిని కోల్పోవాల్సి వస్తుంది. సీతాకోకచిలుకలు పువ్వు/ పిందెలపై ఒక్కో గుడ్డును పెడతాయి. వీటినుంచి వచ్చే లార్వాలు కాయలోపలికి తొలుచుకొని పోయి.. గుజ్జును, గింజలను తింటాయి. కాయకు చేసిన రంధ్రాల ద్వారా బ్యాక్టీరియా, బూజు వ్యాపించి కాయ కుళ్లి, రాలిపోతుంది. ఈ పురుగులను నివారించడానికి పూత, మొగ్గ దశలో ఉన్నప్పుడే.. లీటర్‌ నీటిలో 2 మి.లీ. డైమిథోయేట్‌ లేదా 2 మి.లీ. ప్రొఫినోఫాస్‌ కలిపి పిచికారీ చేయాలి. 15-20 రోజుల తరువాత లీటర్‌ నీటిలో 1 మి.లీ. డైక్లోరోవాస్‌ కలిపి మరోసారి పిచికారీ చేసుకోవాలి.