ఆర్టీసీ సీజన్‌ పాస్‌పై సండే ఫ్రీ

మంత్లీ సీజన్‌ టికెట్స్‌ తీసుకునే ప్రయాణికులకు రాయితీలు కల్పిస్తూ తెలంగాణ ఆర్టీసీ నిర్ణయం తీసుకున్నది. మంత్లీ సీజన్‌ పాస్‌ తీసుకునేవారికి బస్‌ పాస్‌ దూర పరిమితి ఎత్తివేయడంతోపాటు.. రూ.20తోనే అప్‌గ్రేడ్‌ చేసుకునే వెసులుబాటు కల్పించింది.

హైదరాబాద్‌, నవంబర్‌ 13 (నమస్తే తెలంగాణ): మంత్లీ సీజన్‌ టికెట్స్‌ తీసుకునే ప్రయాణికులకు రాయితీలు కల్పిస్తూ తెలంగాణ ఆర్టీసీ నిర్ణయం తీసుకున్నది. మంత్లీ సీజన్‌ పాస్‌ తీసుకునేవారికి బస్‌ పాస్‌ దూర పరిమితి ఎత్తివేయడంతోపాటు.. రూ.20తోనే అప్‌గ్రేడ్‌ చేసుకునే వెసులుబాటు కల్పించింది. దీంతోపాటు నిర్దేశించిన ప్రాంతాల్లో ఆదివారం ఉచిత ప్రయాణం అమలు చేస్తున్నట్టు ప్రకటించింది. సంస్థ తమ నెలవారీ సీజన్‌ టికెట్‌ (ఎంఎస్‌టీ) పథకం కింద 9 అదనపు సౌకర్యాలు, ప్రత్యేక రాయితీలను ప్రకటించింది.

ఈ సవరించిన నిబంధనలు నేటి నుంచి రాష్ట్రవ్యాప్తంగా అమలులోకి రానున్నాయి. విద్యార్థులు, ఉద్యోగులు, నిత్యం రాకపోకలు సాగించే ప్రయాణికులకు ఈ నిర్ణయం ఆర్థికంగా ఎంతో ఊరటనివ్వన్నట్టు ఆర్టీసీ తెలిపింది. ఈ నూతన నిర్ణయాల ప్రకారం.. నెలవారీ సీజన్‌ టికెట్ల జారీకి ఇప్పటివరకు ఉన్న దూర పరిమితిని ఆర్టీసీ పూర్తిగా తొలగించింది. నిర్దేశించిన రూట్‌, చార్జీల నిబంధనలకు లోబడి, ప్రయాణికులు ఇకపై ఎలాంటి దూర పరిమితి లేకుండా నెలవారీ సీజన్‌ టికెట్లను పొందవచ్చు. సాధారణ ప్రయాణికులకు మెరుగైన ప్రయాణాన్ని అందించేందుకు డీలక్స్‌ నెలవారీ సీజన్‌ టికెట్లను కూడా ఆర్టీసీ ప్రవేశపెడుతున్నది. అవి ఈ-డీలక్స్‌ సర్వీసుల్లో కూడా చెల్లుబాటు అవుతాయి.

ఇక నెలవారీ సీజన్‌ టికెట్‌ హోల్డర్లకు ప్రత్యేక ప్రయోజనంగా హైదరాబాద్‌, వరంగల్‌, నిజామాబాద్‌, నల్లగొండ, కరీంనగర్‌లో నడిచే అన్ని క్యాటగిరీల సిటీ బస్సు సర్వీసుల్లో ఆదివారాల్లో ఉచితంగా ప్రయాణించే వెసులుబాటును కల్పించారు. అయితే, ఈ సౌకర్యం గ్రేటర్‌ హైదరాబాద్‌ జోన్‌ పరిధిలోని పుష్పక్‌ ఎయిర్‌ పోర్ట్‌ లైనర్‌ సర్వీసులకు, ఇతర ప్రభుత్వ సెలవు దినాలకు వర్తించవని స్పష్టంచేశారు. అదేవిధంగా ప్రయాణ సౌలభ్యం కోసం కాంబీ టికెట్‌ సదుపాయాన్ని కూడా అందుబాటులోకి తెచ్చారు. దీనికింద ప్రతి ప్రయాణానికీ అదనంగా రూ.20 చెల్లించి కాంబీ టికెట్‌ తీసుకోవడం ద్వారా పల్లెవెలుగు మంత్లీ సీజన్‌ టికెట్‌ హోల్డర్స్‌ ఎక్స్‌ప్రెస్‌, ఈ-ఎక్స్‌ప్రెస్‌ బస్సుల్లోనూ, అలాగే ఎక్స్‌ప్రెస్‌ ఎంఎస్‌టీ హోల్డర్లు డీలక్స్‌, ఈ-డీలక్స్‌ బస్సులలోనూ ప్రయాణించవచ్చు. అయితే పల్లెవెలుగు పాస్‌దారులకు డీలక్స్‌ లేదా ఈ-డీలక్స్‌ బస్సుల్లో అనుమతి ఉండదు.