అమన్‌కు గోల్డ్‌.. అంతిమ్‌కు సిల్వర్‌

రెజ్లింగ్‌ పోటీల్లో పారిస్‌ ఒలింపిక్స్‌ కాంస్య విజేత అమన్‌ సెహ్రావత్‌ బంగారు పతకం నెగ్గగా.. అంతిమ్‌ పంగల్‌ రజతం, దీపక్‌ పునియా కాంస్యాలు అందుకున్నారు.

పురుషుల 57 కేజీల ఫ్రీస్టయిల్‌ విభాగంలో అమన్‌ చాంపియన్‌గా నిలిచాడు. గత ఆసియాడ్‌లో సాధించిన కాంస్యాన్ని ఈసారి పసిడిగా మార్చుకున్నాడు. ఫైనల్లో అమన్‌ 11-7తో ఉత్తర కొరియాకు చెందిన ప్రపంచ చాంపియన్‌ చోంగ్‌ సాంగ్‌ హాన్‌ను ఓడించి ఔరా అనిపించాడు. మహిళల 53 కేజీల విభాగంలో స్వర్ణం సాధించి స్టార్‌ రెజ్లర్‌ వినేశ్‌ ఫొగాట్‌ సరసన నిలవాలని ఆశించిన అంతిమ్‌ ఆశ నెరవేరలేదు.

ఫైనల్లో 1-9తో జపాన్‌ రెజ్లర్‌, వరల్డ్‌ చాంపియన్‌ మోయ్‌ మియోకా చేతిలో ఓడి రజతంతో సరిపెట్టుకుంది. పురుషుల 97 కేజీల విభాగం కాంస్య పతక పోరులో దీపక్‌ పునియా 2-1తో గాన్‌బాటార్‌ (మంగోలియా)పై నెగ్గాడు. కాగా, సాగర్‌ జగ్లాన్‌ (74 కేజీలు), మనీషా భన్వాలా (57 కేజీలు) నిరాశపరిచారు.ఈ ఆసియాడ్‌లో భారత రెజ్లర్లు రెండేసి స్వర్ణాలు, రజతాలు, కాంస్యాలతో ఆరు పతకాలు అందుకున్నారు.