Ons Jabeur : వరల్డ్ నంబర్ 3 క్రీడాకారిణి ఓన్స్ జుబెర్ దోహ, దుబాయ్ ఓపెన్ టోర్నమెంట్ నుంచి తప్పుకుంటున్నట్టు ప్రకటించింది. మైనర్ సర్జరీ కారణంగా తాను ఈ రెండు టోర్నమెంట్లలో ఆడడం లేదని ఆమె తెలిపింది. అయితే.. సర్జరీ వివరాలు మాత్రం వెల్లడించలేదు. ‘కోర్టులో దిగి, రాణించడానికి ముందు మైనర్ సర్జరీ చేయించుకోవాలని నా వైద్య బృందం చెప్పింది. నా ఆరోగ్యాన్ని కాపాడుకోవడం కోసం ఈ నిర్ణయం తీసుకున్నా. దోహ, దుబాయ్ ఓపెన్ నుంచి వైదొలగడం నాకు బాధగానే ఉంది. ఈ టోర్నమెంట్ కోసం ఎదురుచూస్తున్న మధ్య ఆసియాలోని అభిమానులకు క్షమాపణలు చెబుతున్నా. నేను పూర్తి ఆరోగ్యంగా, బలంగా అయ్యాక మీ అందరిని కలుస్తానిని మాట ఇస్తున్నా’ అని జుబెర్ తెలిపింది.
ట్యునీషియాకు చెందిన జుబెర్ ఆస్ట్రేలియన్ ఓపెన్ రెండో రౌండ్లోనే ఇంటిదారి పట్టింది. మర్కెట వొండ్రసోవ చేతిలో6-1, 5-7, 6-1తో ఓడి పోయింది. పోయిన ఏడాది వింబుల్డన్, యూఎస్ ఓపెన్ టోర్నీల్లో అద్భుతంగా ఆడింది. రెండింటిలోనూ ఫైనల్కు దూసుకెళ్లింది. అయితే.. ఫైనల్లో ఓటమితో ట్రోఫీ చేజార్చుకుంది. దోహా ఓపెన్ ఫిబ్రవరి 13 నుంచి 18 వరకు జరగనుంది. ఆ తర్వాత దుబాయ్ డ్యూటీ ఫ్రీ ఛాంపియన్షిప్స్ మొదలు కానున్నాయి.