Visit:
న్యూయార్క్ : యూఎస్ ఓపెన్ గ్రాండ్స్లామ్ టోర్నమెంట్లో డిఫెండింగ్ చాంపియన్ కార్లోస్ అల్కరాస్ తిరుగులేని ఆధిపత్యం ప్రదర్శిస్తున్నాడు. అలవోక విజయాలతో మరో టైటిల్ దిశగా దూసుకెళ్తున్నాడు. లోకల్ ఫేవరెట్, అమెరికా ప్లేయర్ టామీ పాల్కు చెక్ పెట్టిన స్పెయిన్ స్టార్ క్వార్టర్ ఫైనల్లో అడుగు పెట్టాడు. మరోవైపు టైటిల్ ఫేవరెట్లలో ఒకడైన డానిల్ మెద్వెదెవ్, గ్రీస్ ప్లేయర్ స్టెఫనోస్ సిట్సిపాస్ ప్రిక్వార్టర్స్లోనే ఇంటిదారి పట్టారు. ఆదివారం అర్ధరాత్రి జరిగిన పురుషుల సింగిల్స్ ప్రిక్వార్టర్స్లో రెండో సీడ్ కార్లోస్ 6-4, 6-3, 6-4 తో పాల్ను వరుస సెట్లలో చిత్తు చేశాడు.
గాయం నుంచి కోలుకున్న తర్వాత అల్కరాస్ ఆడుతున్న తీరు అభిమానులను ఆకట్టుకుంటోంది. ఈ మ్యాచ్లో ప్రత్యర్థికి ఏ చిన్న అవకాశం ఇవ్వని కార్లోస్ బలమైన సర్వీస్లతో సత్తా చాటాడు. నాలుగు బ్రేక్ పాయింట్లు నెగ్గి టోర్నీలో ముందంజ వేశాడు. గ్రాండ్స్లామ్ టోర్నీల్లో కార్లోస్కు ఇది వరుసగా 18వ విజయం కావడం విశేషం. క్వార్టర్స్లో తను మరో అమెరికన్, 8వ సీడ్ బెన్ షెల్టన్తో పోటీ పడనున్నాడు. మరో పోరులో షెల్టన్ 6-2, 6-3, 6-4 తో వరుస సెట్లలో గ్రీక్ స్టార్ స్టెఫనోస్ సిట్సిపాస్ను ఓడించి కెరీర్లో రెండోసారి యూఎస్ ఓపెన్ క్వార్టర్ ఫైనల్స్కు చేరాడు.
సిట్సిపాస్ నిష్క్రమణతో గ్రాండ్ స్లామ్ టెన్నిస్ చరిత్రలోనే ఒక అరుదైన, సుదీర్ఘమైన రికార్డుకు తెరపడింది. 1877లో గ్రాండ్స్లామ్ పోటీలు ప్రారంభమైనప్పటి నుంచి ప్రతి ఏడాది కనీసం ఒక్కరైనా వన్-హ్యాండెడ్ బ్యాక్హ్యాండ్ ప్లేయర్ (ఒకే చేతితో బ్యాక్ హ్యాండ్ షాట్ కొట్టే ఆటగాడు) ఓ మేజర్ టోర్నీ సెమీఫైనల్కు చేరడం ఆనవాయితీగా వస్తోంది. అయితే ఈసారి సిట్సిపాస్ ఓటమితో ఒక సీజన్లోని ఏ గ్రాండ్ స్లామ్లోనూ వన్-హ్యాండెడ్ బ్యాక్హ్యాండ్ ప్లేయర్ సెమీఫైనల్ చేరకపోవడం 149 ఏళ్ల చరిత్రలో ఇదే తొలిసారి కావడం గమనార్హం.
పురుషుల డబుల్స్లో భారత ఆటగాడు శ్రీరామ్ బాలాజీ పోరాటం రెండో రౌండ్లోనే ముగిసింది. బాలాజీ-ఇవాన్ కింగ్ (అమెరికా) ద్వయం 4-6, 5-7తో రోజర్ వాసెలిన్ (ఫ్రాన్స్)-హ్యూగో నైస్ (మొనాకో) ద్వయం చేతిలో వరుస సెట్లలో పరాజయం పాలైంది.
మహిళల సింగిల్స్లో మూడో సీడ్ జెస్సికా పెగులా, ఐదో సీడ్ మిరా ఆండ్రీవా, ఆరో సీడ్ లిండా నొస్కోవా క్వార్టర్స్లో అడుగు పెట్టారు. కానీ, పోలాండ్ స్టార్ ఇగా స్వైటెక్కు షాక్ తగిలింది. ప్రిక్వార్టర్స్లో అమెరికన్ పెగులా 6-3, 6-4తో సొరానా కిర్స్టియా (రుమేనియా)ను వరుస సెట్లలో చిత్తుగా ఓడించింది.
ఫ్రెంచ్ ఓపెన్ విన్నర్ ఆండ్రీవా (రష్యా) తొలి సెట్ కోల్పోయినా పుంజుకొని 5-7, 6-4, 6-3తో 24వ సీడ్ పొటపోవాపై పోరాడి గెలిచింది. చెక్ రిపబ్లిక్ భామ నొస్కోవా7-5 5-7 6-4తో 11వ సీడ్ కోస్త్యూక్ (ఉక్రెయిన్)ను ఓడించి క్వార్టర్స్లో టాప్ సీడ్ సబలెంకాతో పోటీకి సిద్ధమైంది. ఏడో గ్రాండ్స్లామ్పై కన్నేసిన 8వ సీడ్ స్వైటెక్ 5-7, 3-6తో అన్సీడెడ్ క్విన్వెన్ జెంగ్ (చైనా) చేతిలో అనూహ్యంగా ఓడి ఇంటిదారి పట్టింది.
అమెరికా స్టార్ ఫ్రాన్సెస్ తియఫో సొంత అభిమానుల మద్దతుతో సంచలన విజయం సాధించాడు. 11వ సీడ్ తియఫో 7-6 (7/1), 6-4, 7-6 (8/6)తో మాజీ చాంపియన్, ఏడో సీడ్ డానియెల్ మెద్వెదెవ్ కు షాకిచ్చాడు. ఉత్కంఠగా సాగిన ప్రిక్వార్టర్స్లో తియఫో పవర్ఫుల్ సర్వ్లు, బేస్లైన్ షాట్లతో రష్యా స్టార్ను ఓడించి క్వార్టర్ ఫైనల్ బెర్త్ను ఖరారు చేసుకున్నాడు.
గతంలో మెద్వెదెవ్తో ఆడిన ఏడు మ్యాచ్ల్లో ఆరుసార్లు ఓడిన తియఫో ఈసారి ప్రతీకారం తీర్చుకున్నాడు. మరో పోరులో అలెక్స్ మిచెల్సెన్ (అమెరికా) 7-6(6) 6-4 6-4 థామస్ మార్టిన్ (అర్జెంటీనా)ను ఓడించి క్వార్టర్స్లో తియఫోతో సవాల్కు సిద్ధమయ్యాడు.
