కొబ్బరికాయ సైజులో కణితి… సర్జరీ ద్వారా తొలగించిన డాక్టర్లు

పెద్ద పరిమాణంలో ఉన్న థైరాయిడ్‌ కణితులను సుమారు 250కు పైగా సర్జరీల ద్వారా తొలగించినట్లు డాక్టర్ సంగీత్ అగర్వాల్ తెలిపారు. అయితే కొబ్బరికాయ సైజులో ఉన్న ఇలాంటి కణితిని తాను ఇప్పటి వరకు చూడలేదని చెప్పారు.

న్యూఢిల్లీ: కొబ్బరికాయ పరిమాణంలో ఉన్న కణితిని సర్జరీ ద్వారా డాక్టర్లు తొలగించారు. థైరాయిడ్ గ్రంధి వద్ద ఇంత పెద్ద సైజులో ఉన్న కణితిని చూడటం ఇదే తొలిసారని వారు తెలిపారు. బీహార్‌లోని బెగుసరాయ్ జిల్లాకు చెందిన 72 ఏళ్ల రైతు గొంతులోని థైరాయిడ్ గ్రంధి వద్ద కణితి ఏర్పడింది. కొబ్బరికాయ సైజులో అది ఉంది. దీంతో ఆహారం మిగడంతోపాటు ఊపిరి పీల్చుకోవడం కష్టంగా మారింది. గత ఆరు నెలల నుంచి ఇబ్బంది పడుతున్న ఆ రైతును ఢిల్లీలోని సర్ గంగా రామ్ హాస్పిటల్‌లో అడ్మిట్‌ చేశారు. రోగిని పరిశీలించిన వైద్యులు టెంకాయ సైజులో ఏర్పడిన కణితిని చూసి ఆశ్చర్యపోయారు. గత నెలలో మూడు గంటలపాటు సర్జరీ చేసి దానిని తొలగించారు.

కాగా, పెద్ద పరిమాణంలో ఉన్న థైరాయిడ్‌ కణితులను సుమారు 250కు పైగా సర్జరీల ద్వారా తొలగించినట్లు డాక్టర్ సంగీత్ అగర్వాల్ తెలిపారు. అయితే కొబ్బరికాయ సైజులో ఉన్న ఇలాంటి కణితిని తాను ఇప్పటి వరకు చూడలేదని చెప్పారు. సాధారణంగా శీతాకోకచిలుక ఆకారంలో ఉండే థైరాయిడ్‌ గ్రంధి 3-4 సెంటీమీటర్ల సైజు, 10-15 గ్రాముల బరువు ఉంటుందని అన్నారు. అయితే బీహార్‌ రైతు గొంతులో ఏర్పడిన కణితి 18-20 సెంటీమీటర్ల పరిమాణంలో ఉందని తెలిపారు. ఈ నేపథ్యంలో భారీ కణితిని తొలగించే క్రమంలో ఆ రోగి గొంతు మూగబోకుండా కాపాడం తమకు సవాల్‌గా మారిందన్నారు. అన్ని జాగ్రత్తలు తీసుకుని ఓకల్‌ కార్డ్‌ నరాలు దెబ్బతినకుండా ఆ కణితిని విజయవంతంగా తొలగించినట్లు వెల్లడించారు.