ఇమ్రాన్ ఖాన్ ఆరోప‌ణ‌ల్ని ఖండించిన‌ అమెరికా..

వాషింగ్ట‌న్‌: పాకిస్థాన్ ప్ర‌ధాని ఇమ్రాన్ ఖాన్ చేసిన వ్యాఖ్య‌ల‌ను అమెరికా ఖండించింది. త‌న‌ను త‌ప్పించేందుకు విదేశీ కుట్ర జ‌రిగిన‌ట్లు ఇటీవ‌ల పాక్ ప్ర‌ధాని ఇమ్రాన్ అన్నారు. గురువారం జాతిని ఉద్దేశించి మాట్లాడుతూ త‌మ ప్ర‌భుత్వాన్ని కూల్చ‌డంలో విదేశీ హ‌స్తం ఉంద‌ని, అమెరికా ఆ ప్ర‌య‌త్నం చేసింద‌ని ఓ బెదిరింపు లేఖ గురించి ఇమ్రాన్ చెప్పారు. ప్ర‌సంగంలో తొలుత అమెరికా అని చెప్పిన ఇమ్రాన్ ఆ త‌ర్వాత స‌రిచేసుకుని ఓ విదేశీ హ‌స్తం జోక్యం చేసుకుంటున్న‌ట్లు తెలిపారు. అయితే శుక్ర‌వారం వైట్‌హౌజ్ ప్ర‌తినిధి కేట్ బిడింగ్‌ఫీల్డ్ దాని గురించి స్పందించారు. ఇమ్రాన్ వ్యాఖ్య‌లను ఆమె తిప్పికొట్టారు. అధికారం నుంచి ఇమ్రాన్‌ను తొల‌గించేందుకు అమెరికా కుట్ర ప‌న్నిందా అన్న ప్ర‌శ్నకు ఆమె బ‌దులిస్తూ.. ఆ ఆరోప‌ణ‌ల్లో వాస్త‌వం లేద‌న్నారు. ఇమ్రాన్ ఖాన్‌పై ప్ర‌వేశ‌పెట్టిన అవిశ్వాస తీర్మానంలో త‌మ ప్ర‌మేయం ఏమీ లేద‌ని అమెరికా తెలిపింది. స్టేట్ డిపార్ట్‌మెంట్ ప్ర‌తినిది నెడ్ ప్రైజ్ కూడా ఇమ్రాన్ వ్యాఖ్య‌ల్ని తిర‌స్క‌రించారు. ఇమ్రాన్‌ను తొలగించాల‌ని త‌మ ప్ర‌భుత్వం భావించ‌డం లేద‌న్నారు. పాక్‌లో జ‌రుగుతున్న ప‌రిణామాల‌ను గ‌మ‌నిస్తున్నామ‌ని, పాక్ రాజ్యాంగ్య వ్య‌వ‌స్త‌ను గౌర‌విస్తాం, మ‌ద్ద‌తు ఇస్తామ‌న్నారు. కానీ ఇమ్రాన్ ఆరోప‌ణ‌ల్లో నిజం లేద‌న్నారు.