Tit for tat: 36 దేశాల విమానాలను నిషేధించిన రష్యా

మాస్కో: ఉక్రెయిన్‌పై యుద్ధానికి దిగిన రష్యా తమ దేశంపై ఆంక్షలు విధించిన దేశాలకు ప్రతిగా ఆంక్షలు విధిస్తున్నది. టిట్‌ ఫర్‌ టాట్‌ అన్నట్లుగా వ్యవహరిస్తున్నది. ఐరోపాలోని 36 దేశాలు రష్యా విమానయాన సంస్థపై నిషేధం విధించాయి. దీంతో రష్యా కూడా ప్రతీకార చర్యలు చేపట్టింది. బ్రిటన్‌, జర్మనీ సహా 36 దేశాల విమానాలపై నిషేధం విధించింది. రష్యా ఎయిర్‌పోర్టుల్లో కార్యకలాపాలు, గగనతలాన్ని ఆయా దేశాల విమానాలు వినియోగించుకోవడాన్ని నిషేధించింది. రష్యా విమానయాన అథారిటీ ఈ మేరకు సోమవారం ఉత్తర్వులు జారీ చేసింది.

మరోవైపు రష్యా విదేశాంగ మంత్రి లావ్రోవ్, జనీవాలోని ఐక్యరాజ్య సమితి పర్యటనను రద్దు చేసుకున్నారు. రష్యా విమానాలతోపాటు గగనతలం వినియోగంపై యూరోపియన్‌ యూనియన్‌ (ఈయూ) దేశాలు నిషేధం విధించడంతో ఈ నిర్ణయం తీసుకున్నారు. రష్యా అధికారులు ఈ మేరకు వెల్లడించారు.

ఉక్రెయిన్‌పై రష్యా యుద్ధం ఐదో రోజుకు చేరింది. ఇరు దేశాలు ఒకవైపు చర్చలు జరుపుతూనే మరోవైపు తలపడుతున్నాయి. రాజధాని కీవ్‌ స్వాధీనానికి రష్యా దళాలు ప్రయత్నిస్తున్నాయి. అయితే ఉక్రెయిన్‌ ఆర్మీ గట్టిగా ప్రతిఘటిస్తున్నది. ఈ నేపథ్యంలో రష్యా తాజాగా హెచ్చరికలు జారీ చేసింది. కీవ్‌ నగరాన్ని ఖాళీ చేయాలని ఉక్రేనియన్లకు సూచించింది. దీంతో సోమవారం ఉదయం కీవ్‌లో వైమానిక దాడి సైరన్లు హోరెత్తాయి.