Visit:
వాషింగ్టన్, మార్చి 24: వలసదారులకు పెద్దపీట వేస్తే అమెరికాలో ఇక అంతర్యుద్ధం తప్పదని మాగా (మేక్ అమెరికా గ్రేట్ అగైన్) మద్దతుదారులు హెచ్చరించారు. విదేశీ డాక్టర్లకు రెసిడెన్సీ స్లాట్లను కేటాయించడంపై ఆగ్రహం వ్యక్తం చేశారు. అమెరికాలో వైద్య శాస్త్రంలో ఎంబీబీఎస్ తత్సమాన డిగ్రీ తర్వాత చేసే దానిని రెసిడెన్సీ (భారత్లో ఎండీ, ఎంఎస్ లాంటిది) అంటారు. దీని నిమిత్తం నిర్వహించే సీట్ అలాట్మెంట్ ప్రక్రియను ఎన్ఆర్ఎంపీ అంటారు. అంటే భారత్లో సీట్ల కేటాయింపునకు ముందు జరిగే కౌన్సిలింగ్ లాంటిది.
నేషనల్ మెడికల్ రెసిడెంట్ మ్యాచింగ్ ప్రోగ్రామ్ (ఎన్ఆర్ఎంపీ) ఫలితాలు విడుదలైన అనంతరం దేశ వ్యాప్తంగా ఇమిగ్రేషన్, వైద్య ప్రమాణాలు, వైద్య రంగంలో అమెరికాకు చెందిన ఆరోగ్య సంరక్షణ విభాగం సిబ్బంది భవిష్యత్తుపై చర్చ మొదలైంది. ‘వలసదారులను ఆపకపోతే, అమెరికా భూభాగం నుంచి వారిని తొలగించకపోతే అంతర్యుద్ధం వస్తుందని విస్తృతంగా షేర్ చేసిన ఒక పోస్ట్ హెచ్చరించింది. ‘వారి సగటు ఐక్యూ 76.. కానీ అమెరికాలో డాక్టర్గా మారడానికి అమెరికన్లకు బదులుగా వారికే శిక్షణ ఇస్తున్నారా?’ అని పేర్కొన్నారు. ‘మేము వారిని రమ్మని అడగ లేదు. వారు ఇక్కడ ఉండటం మాకు ఇష్టం లేదు. వారిని వెంటనే దేశం నుంచి పంపేయండి. అమెరికన్ల జీవితాలను, వారి భవిష్యత్ను అపహరించే హక్కు ఆ మూడో ప్రపంచ చెత్తకు లేదు. ఇక్కడితో దానికి స్వస్తి పలకండి’ అని వారు పేర్కొన్నారు.
