Covid Origins: వుహాన్ ల్యాబ్‌లో కోవిడ్ ఆన‌వాళ్లు లేవు : అమెరికా ఇంటెలిజెన్స్

Covid Origins: కోవిడ్ ఎక్క‌డ పుట్టిందో ఇంకా క్లారిటీ రాలేదు. చైనాలోని వుహాన్ ల్యాబ్‌లో ఆ వైర‌స్‌కు చెందిన ఆధారాలు దొర‌క‌లేద‌ని అమెరికా ఇంటెలిజెన్స్ తాజాగా ఓ నివేదిక‌ను రిలీజ్ చేసింది. దీంతో వైర‌స్ పుట్టుక ఇంకా ర‌హ‌స్యంగానే మిగిలిపోయింది. వుహాన్ ల్యాబ్‌లో స‌మ‌గ్ర స్థాయిలో ద‌ర్యాప్తు జ‌రిగిన‌ట్లు అమెరికా ఇంటెలిజెన్స్ పేర్కొన్న‌ది.

న్యూయార్క్‌: కోవిడ్‌19 ఆన‌వాళ్ల‌(Covid Origins)కు చెందిన కొత్త రిపోర్టును అమెరికా ఇంటెలిజెన్స్ రిలీజ్ చేసింది. చైనాలోని వుహాన్ వైరాల‌జీ ల్యాబ్ నుంచి ఆ వైర‌స్ పాకిన‌ట్లు ఆధారాలు దొర‌క‌లేద‌ని ఆ నివేదిక‌లో తెలిపారు. మొత్తం నాలుగు పేజీల రిపోర్టును నేష‌న‌ల్ ఇంటెలిజెన్స్ ఆఫీసు డైరెక్ట‌ర్ శుక్ర‌వారం రిలీజ్ చేశారు. ల్యాబ్ నుంచి కోవిడ్‌ వైర‌స్ వ్యాప్తి అయింద‌న్న వాస్త‌వాల‌ను కొట్టిపారేయ‌లేమ‌ని, కానీ ఆ వైర‌స్ ఆన‌వాళ్ల‌ను మాత్రం గుర్తించ‌లేక‌పోయిన‌ట్లు రిపోర్టులో తెలిపారు.

సీఐఏ కానీ ఇత‌ర ఏజెన్సీలు కానీ.. కోవిడ్ పుట్టుక గురించి పూర్తి వివ‌రాల‌ను సేక‌రించ‌లేక‌పోయిన‌ట్లు ఓడీఎన్ఐ తెలిపింది. వుహాన్ వైరాల‌జీ ఇన్స్‌టిట్యూట్‌లో స‌మ‌గ్ర స్థాయిలో ద‌ర్యాప్తు చేప‌ట్టిన‌ట్లు రిపోర్టులో వెల్ల‌డించారు. కానీ మ‌హమ్మారికి చెందిన ఆధారాలు ఏవీ చిక్క‌లేద‌న్నారు. సార్స్ సీవోవీ-2 వైర‌స్‌కు చెందిన ఆన‌వాళ్లు ఏమీ లేన‌ట్లు తెలిపారు.

క‌రోనా వైర‌స్ ప్ర‌పంచ‌వ్యాప్తంగా ప్ర‌బ‌లిన త‌ర్వాత ఆ వైర‌స్ పుట్టుక చ‌ర్చ‌నీయాంశ‌మైన విష‌యం తెలిసిందే. అమెరికాతో పాటు ఎన్నో దేశాలు ఆ వైర‌స్ జాడ గురించి ఆరా తీస్తూనే ఉన్నాయి.