న్యూఢిల్లీ : స్పేస్ ఎక్స్, టెస్లా సీఈఓ ఎలన్ మస్క్ 2016లో విమానంలో వెళుతూ తనను లైంగిక వేధింపులకు గురిచేశాడని ఆరోపించిన ఎయిర్ హోస్టెస్కు దాదాపు రూ . 1.5 కోట్లు చెల్లించి నోరు మూయించారని వార్తలు వచ్చాయి. ఎలన్ మస్క్ అభ్యంతరకరంగా వ్యవహరించాడని ఆరోపణలు చేసిన ఎయిర్ హోస్టెస్కు 2018లో భారీ మొత్తం చెల్లించి స్పేస్ ఎక్స్ ఈ వ్యవహారాన్ని సెటిల్ చేసింది.
స్పేస్ ఎక్స్ కార్పొరేట్ జెట్ విమానాల్లో కాంట్రాక్ట్ ఉద్యోగినిగా పని చేసే మహిళ మస్క్పై చేసిన లైంగిక వేధింపుల ఆరోపణలు దుమారం రేపాయి. ఎయిర్ హోస్టెస్ కాలును మస్క్ ఆమె సమ్మతి లేకుండా తాకడం సహా ఆమె పట్ల అభ్యంతరకరంగా వ్యవహరించాడని బిజినెస్ ఇన్సైడర్ పేర్కొంది. ఆమెకు గుర్రం లేదా ఎరోటిక్ మసాజర్ కొనిస్తానని ఆఫర్ చేశాడని తెలిపింది. ఫ్లైట్ అటెండెంట్ ఫ్రెండ్ బాధితురాలి వాదనకు మద్దతుగా వెల్లడించిన డిక్లరేషన్లో ఈ వివరాలు పొందుపరిచారు.
2016లో గల్ఫ్స్ట్రీమ్ జీ650ఈఆర్లో మస్క్ ప్రయాణిస్తుండగా ఆయన తన ప్రైవేట్ రూంకు పిలిచి ఫుల్ బాడీ మసాజ్ చేయాలని కోరినట్టు బాధిత మహిళ వెల్లడించింది. తాను మస్క్ రూంకు వెళ్లగా ఆయన నగ్నంగా మారి తన పట్ల అసభ్యంగా ప్రవర్తించాడని ఆరోపించింది. తాను చెప్పినట్టు చేస్తే తనకు గుర్రాన్ని కొనిస్తానని ఆఫర్ చేశాడని పేర్కొంది. ఎయిర్ హోస్టెస్పై లైంగిక వేధింపుల గురించి మస్క్ను ప్రశ్నించగా ఈ కథనం రాజకీయ దురద్దేశంతో కూడినదని తోసిపుచ్చాడు. తాను లైంగిక వేధింపులకు పాల్పడితే తన 30 ఏండ్ల కెరీర్లో ఇలాంటి ఆరోపణలు తొలిసారిగా వెలుగు చూసేవి కాదని అన్నారు.