Traffic Alert | హైదరాబాద్‌లో నేడు ట్రాఫిక్‌ ఆంక్షలు.. ఆ సమయంలో ప్రత్యామ్నాయ రూట్లు చూసుకోండి..

టాలీవుడ్‌, బాలీవుడ్‌ టాప్‌ హీరోలు ఎన్టీఆర్‌, హృతిక్‌ రోషన్‌ కలిసి నటించిన ‘వార్‌-2’ సినిమా ప్రీ-రిలీజ్‌ వేడుక హైదరాబాద్‌ యూసుఫ్‌గూడలో జరుగనుంది. ఆదివారం సాయంత్రం 5 నుంచి 10 గంటల వరకు యూసుఫ్‌గూడలోని పోలీస్ గ్రౌండ్స్‌లో అట్టహాసంగా ఈ వేడుకను నిర్వహించనున్నారు.

హైదరాబాద్‌: టాలీవుడ్‌, బాలీవుడ్‌ టాప్‌ హీరోలు ఎన్టీఆర్‌, హృతిక్‌ రోషన్‌ కలిసి నటించిన ‘వార్‌-2’ సినిమా ప్రీ-రిలీజ్‌ వేడుక హైదరాబాద్‌ యూసుఫ్‌గూడలో జరుగనుంది. ఆదివారం సాయంత్రం 5 నుంచి 10 గంటల వరకు యూసుఫ్‌గూడలోని పోలీస్ గ్రౌండ్స్‌లో అట్టహాసంగా ఈ వేడుకను నిర్వహించనున్నారు. దేవర హిట్‌ తర్వాత ఎన్టీఆర్‌ నటిస్తుండటం, అందులోనూ బాలీవుడ్‌ ఎంట్రీ మూవీ కావడంతో ఈ సినిమాపై భారీ అంచనాలు ఉన్నాయి. ఈ నేపథ్యంలో ప్రీ రిలీజ్‌ ఈవెంట్‌కు పెద్ద సంఖ్యలో అభిమానులు తరలిరానున్నారు. దీంతో యూసుఫ్‌గూడ పరిసర ప్రాంతాల్లో పోలీసులు ట్రాఫిక్‌ ఆంక్షలు (Traffic Alert) విధించారు. సాయంత్రం 5 నుంచి 10 గంటల వరకు ప్రయాణికులు కేవీబీఆర్ స్టేడియం వైపు వెళ్లకుండా ఉండాలని, ప్రత్యామ్నాయ మార్గాల్లో పోవాలని సూచించారు. మరిన్ని వివరాల కోసం 9010203626 నంబర్‌లోకానీ, @HYDTP సోషల్‌ మీడియాలో ఫాలోకావాలని తెలిపారు.

ట్రాఫిక్ ఆంక్ష‌లు ఇలా..

• జూబ్లీహిల్స్ చెక్‌పోస్టు నుంచి కోట్ల విజ‌య్ భాస్క‌ర్ రెడ్డి స్టేడియం వైపు వ‌చ్చే వాహ‌నాల‌ను కృష్ణా న‌గ‌ర్ జంక్ష‌న్ వ‌ద్ద మ‌ళ్లించి, శ్రీన‌గ‌ర్ కాల‌నీ, పంజాగుట్ట వైపున‌కు మ‌ళ్లించ‌నున్నారు.
• మైత్రివ‌నం జంక్ష‌న్ నుంచి జూబ్లీహిల్స్ చెక్ పోస్టు, మాదాపూర్ వైపు వెళ్లే వాహ‌నాల‌ను యూసుఫ్‌గూడ బ‌స్తీ నుంచి ఆర్బీఐ క్వార్ట‌ర్స్, కృష్ణా న‌గ‌ర్ జంక్ష‌న్ వైపు మ‌ళ్లించ‌నున్నారు.
• మైత్రివ‌నం జంక్ష‌న్ నుంచి బోర‌బండ బస్టాప్ వైపు వెళ్లే వాహ‌నాల‌ను స‌వేర ఫంక్ష‌న్ హాల్ మీదుగా కృష్ణ‌కాంత్ పార్క్, జీటీఎస్ టెంపుల్, క‌ల్యాణ్ న‌గ‌ర్, మోతీ న‌గ‌ర్ మీదుగా బోర‌బండ‌కు మ‌ళ్లించ‌నున్నారు.
• బోర‌బండ బ‌స్టాప్ నుంచి మైత్రివ‌నం జంక్ష‌న్ వైపు వ‌చ్చే వాహ‌నాల‌ను ప్రైమ్ గార్డెన్ వ‌ద్ద మ‌ళ్లించి, మిడ్ ల్యాండ్ బేక‌రీ, జీటీఎస్ కాల‌నీ, క‌ల్యాణ్ న‌గ‌ర్ జంక్ష‌న్, ఉమేశ్ చంద్ర విగ్ర‌హం యూట‌ర్న్, ఐసీఐసీఐ యూట‌ర్న్ మీదుగా మైత్రివ‌నం జంక్ష‌న్‌కు మ‌ళ్లించ‌నున్నారు.