Faisal Malik | బాలీవుడ్‌ ‘రామాయణ’లో కుంభకర్ణుడిగా ‘పంచాయత్’ నటుడు!

Ramayana | బాలీవుడ్ దర్శకుడు నితేష్ తివారీ అత్యంత ప్రతిష్టాత్మకంగా తెరకెక్కిస్తున్న 'రామాయణ' చిత్రానికి సంబంధించి ఒక ఆసక్తికరమైన అప్‌డేట్ వెలువడింది.

Ramayana | బాలీవుడ్ దర్శకుడు నితేష్ తివారీ అత్యంత ప్రతిష్టాత్మకంగా తెరకెక్కిస్తున్న ‘రామాయణ’ చిత్రానికి సంబంధించి ఒక ఆసక్తికరమైన అప్‌డేట్ వెలువడింది. ప్రముఖ వెబ్ సిరీస్ ‘పంచాయత్’లో ప్రహ్లాద్ చా పాత్రతో ఫేమ‌స్ అయిన‌ నటుడు ఫైసల్ మాలిక్ ఈ చిత్రంలో కుంభకర్ణుడి పాత్రను పోషించబోతున్న‌ట్లు తెలుస్తుంది. గతంలో ఈ పాత్ర కోసం బాబీ డియోల్ పేరు వినిపించినప్పటికీ, ఫైసల్ మాలిక్ యొక్క భారీ కాయం, సహజ సిద్ధమైన ఆహార్యం ఈ పాత్రకు అతికినట్లు సరిపోతాయని భావించిన చిత్రబృందం ఆయనను ఖరారు చేసింది. ఇప్పటికే ఫైసల్ మాలిక్ ముంబైలో తన మొదటి షెడ్యూల్ షూటింగ్‌ను కూడా పూర్తి చేసినట్లు సమాచారం. రావణుడిగా నటిస్తున్న కన్నడ స్టార్ యష్‌తో కలిసి ఆయన కీలక సన్నివేశాలలో నటించారు.

ఈ సినిమాలో కుంభకర్ణుడి పాత్రను అత్యంత భారీగా, విజువల్ వండర్‌గా చూపించేందుకు మేకర్స్ ప్లాన్ చేస్తున్నారు. హాలీవుడ్ చిత్రం ‘అవతార్’ తరహాలో అత్యాధునిక గ్రాఫిక్స్ (VFX) సహాయంతో ఈ పాత్రను డిజైన్ చేస్తున్నట్లు తెలుస్తోంది. ఇందుకోసం అంతర్జాతీయ యాక్షన్ మరియు విజువల్ ఎఫెక్ట్స్ బృందం పనిచేస్తోంది. రణబీర్ కపూర్ రాముడిగా, సాయి పల్లవి సీతగా, సన్నీ డియోల్ హనుమంతుడిగా నటిస్తున్న ఈ మెగా ప్రాజెక్టులో ఫైసల్ మాలిక్ చేరడం సినిమాపై అంచనాలను మరింత పెంచింది. త్వరలోనే ఈ భారీ పౌరాణిక చిత్రానికి సంబంధించి మరిన్ని అధికారిక వివరాలు వెల్లడి కానున్నాయి.