Visit:
‘ లిటిల్‌ హార్ట్స్‌’ అనగానే ‘ప్రేమించుకుందాం రా’ సినిమా గుర్తొచ్చింది. అందులో వెంకటేశ్‌ చేతిలో ఉన్న లిటిల్‌ హార్ట్స్‌ ప్యాకెట్‌ మదిలో మెదిలింది. టీజర్‌ చాలా బావుంది. సినిమా తప్పకుండా హిట్‌ అవుతుందనిపిస్తుంది.’ అని అగ్ర దర్శకుడు అనిల్‌ రావిపూడి అన్నారు. మౌళి తనూజ్‌, శివానీ నాగారం జంటగా నటించిన చిత్రం ‘లిటిల్‌ హార్ట్స్‌’. సాయి మార్తాండ్‌ దర్శకుడు. ఆదిత్య హాసన్‌ నిర్మాత. ఈటీవీ విన్‌ ప్రొడక్షన్స్‌లో సినిమా రూపొందింది. సెప్టెంబర్‌ 12న నిర్మాతలు బన్నీవాస్‌, వంశీ నందిపాటి ద్వారా ఈ సినిమా థియేటర్లలోకి రానుంది.
ఈ సందర్భంగా హైదరాబాద్‌లో జరిగిన టీజర్‌ లాంచ్‌ ఈవెంట్‌లో అతిథిగా పాల్గొన్న అనిల్‌ రావిపూడి, టీజర్‌ని విడుదల చేసి మాట్లాడారు. కుటుంబసమేతంగా చూడదగ్గ సినిమా ఇదని హీరో మౌళి చెప్పారు. రెండుగంటలపాటు ఈ సినిమా అందర్నీ అలరిస్తుందని దర్శకుడు తెలిపారు. ఇంకా బన్నీ వాస్‌, ఆదిత్య, సాయికృష్ణ, నితిన్‌రెడ్డి, శివాని, రాజీవ్‌ కనకాల, వంశీ నందిపాటి, సింజిత్‌, సూర్య తదితరులు ఈ కార్యక్రమంలో పాల్గొన్నారు.
