Chandramukhi-2 | చంద్రముఖి సినిమాకున్న ఫాలోయింగ్ అంతా ఇంతా కాదు. ఇప్పటికీ ఈ సినిమా చూస్తుంటే వెన్నులో వణుకు పుడుతుంది. అలాంటి సినిమాకు సీక్వెల్ తెరకెక్కుతుందంటే ఆడియెన్స్ ఏ రేంజ్లో అంచనాలు పెట్టుకుంటారో ప్రత్యేకించి చెప్పనవసరం లేదు. పైగా లారెన్స్, కంగానా వంటి ధీటైన నటులు సినిమాలో భాగం కావడంతో అందరిలోనూ అమితాసక్తి ఏర్పడింది. కట్ చేస్తే రెండు వారాల కిందట రిలీజైన ట్రైలర్ ప్రేక్షకులను కొసమెరుపు కూడా ఆకట్టుకోలేకపోయింది. దానికి తోడు ట్రోలర్ రాయుళ్లకు కావాల్సిన స్టఫ్ అంతా ట్రైలర్లోనే కనిపించింది. ఇక కథ కూడా ఏ మాత్రం మార్చినట్లు లేదు. అదే కథను 4కేలో చూపించబోతున్న ఫీలింగ్ కలుగుతుంది.
పైగా రిలీజ్ డేట్ వాయిదా పడటం ఈ సినిమాకు బిగ్గెస్ట్ మైనస్. ఎందుకంటే ఈ శుక్రవారం మార్క్ ఆంటోని తప్పితే బజ్ ఉన్న సినిమా ఒక్కటి కూడా రిలీజ్ కాలేదు. పైగా లారెన్స్తో పోల్చితే విశాల్కు ఇక్కడ అంత మార్కెట్ లేదు. క్రేజ్ కూడా లేదు. అలాంటిది ఈ రోజు వచ్చుంటే మట్టుకు సినిమా ఎలాగున్నా మంచి ఓపెనింగ్స్ మాత్రం దక్కేవి. ఇన్ని గందరగోళాల మధ్య ఈ సినిమా నిడివి అందరిని ఆశ్చర్యానికి గురిచేస్తుంది. ఈ సినిమా రన్ టైమ్ 2 గంటల 50 నిమిషాలట. ఇంత లెంగ్తీ రన్టైమ్లో ప్రేక్షకుడ్ని థియేటర్లో కూర్చోబెట్టడం అంటే కత్తి మీద సామే అని చెప్పాలి.
కథలో కొత్తదనం ఉండి, కాస్త ఎంటర్టైన్ చేయగలిగితే ఒకే కానీ.. కంటెంట్లో ఏ మాత్రం తేడా కొట్టినా మొదటికే మోసం వచ్చే చాన్స్ ఉంది. పైగా ఈ మధ్య రిలీజైన ఖుషి కేవలం రన్టైమ్ ఎక్కువ ఉండటంతోనే రివ్యూలు అలా వచ్చాయన్నది ఓపెన్ టాక్. పైగా చంద్రముఖి ఒరిజనల్ వెర్షన్ 2గంటల 46 నిమిషాలు. ఇక ఇప్పుడు 4 నిమిషాలు అదనంగా ఈ సినిమా నిడివి ఉండనుంది. పి.వాసు దర్శకత్వం వహించిన ఈ సినిమా సెప్టెంబర్ 28న రిలీజ్ కాబోతుంది. దీనికి రామ్ స్కంద గట్టి పోటీని ఇవ్వనుంది.