Visit:
Bigg Boss 10 | బిగ్‌బాస్ తెలుగు 10వ సీజన్‌లో ఆరో వారానికి సంబంధించిన కెప్టెన్సీ పోటీ, ఇమ్యూనిటీ గేమ్‌లు ఆసక్తికరంగా సాగాయి. రెండు రోజుల పాటు జరిగిన టీమ్ టాస్కుల్లో విజయం సాధించిన భైరవ రెడ్ టీమ్ కెప్టెన్సీ పోటీకి అర్హత సాధించింది. అయితే కెప్టెన్సీ పోరుకు ఆ టీమ్ నుంచి కేవలం ఐదుగురు మాత్రమే వెళ్లాలని బిగ్‌బాస్ చెప్పడంతో రెడ్ టీమ్‌లో చర్చలు, విభేదాలు మొదలయ్యాయి. రెడ్ టీమ్‌లో అమన్ తాను కెప్టెన్సీ పోటీలో ఉండాలని చెప్పగా, రోహిత్ అందుకు అభ్యంతరం వ్యక్తం చేశాడు. తమ అగ్నిపరీక్ష బ్యాచ్‌కు ఎలా ఉపయోగపడేలా నిర్ణయం తీసుకోవాలనే అంశంపై అమన్‌తో రోహిత్ చర్చించాడు. మరోవైపు బ్లూ టీమ్ సభ్యులు కూడా రెడ్ టీమ్‌లోని నిర్ణయాలపై తమ అభిప్రాయాలను వ్యక్తం చేశారు.
ఎవరెవరు కెప్టెన్సీ పోరుకు వెళ్లాలనే విషయంలో రెడ్ టీమ్‌లో ఏకాభిప్రాయం కుదరకపోవడంతో చివరకు ఓటింగ్ నిర్వహించారు. ఈ క్రమంలో అమన్ పేరు రావడంతో రోహిత్ మరోసారి అభ్యంతరం వ్యక్తం చేశాడు. తన బ్యాచ్‌కు నష్టం జరుగుతుందని అమన్‌తో వాదనకు దిగాడు. మొదట కెప్టెన్సీ పోరుకు వెళ్లేందుకు అమన్ ఆసక్తి చూపకపోయినా సుధీర్, ముకేశ్ సూచనతో చివరకు పోటీకి సిద్ధమయ్యాడు. చివరికి వర్షిణి, ఝాన్సీ, రామ్ ప్రసాద్, అపూర్వ, అమన్‌లు కెప్టెన్సీ కంటెండర్లుగా ఎంపికయ్యారు. అయితే అమన్ పోటీలోకి రావడం రోహిత్‌కు నచ్చలేదు. అమన్‌ను పిలిచి ఇతరుల ప్రభావానికి లోనై నిర్ణయం తీసుకున్నావంటూ ప్రశ్నించాడు. తనను సంప్రదించకుండా ఎందుకు నిర్ణయం తీసుకున్నావని నిలదీశాడు. దీంతో మరోసారి అగ్నిపరీక్ష బ్యాచ్ వ్యవహారం హౌస్‌లో చర్చనీయాంశమైంది.
కెప్టెన్సీ కోసం బిగ్‌బాస్ ‘పాత్ టు పవర్’ అనే మూడు దశల టాస్క్‌ను నిర్వహించాడు. మొదటి దశలో పోల్స్‌కు వేలాడుతున్న బ్యాగులను కిందకు పడేసి, అందులోని తాళ్లను తీసుకుని ఎదురుగా ఉన్న డబ్బాల మధ్య వంతెన నిర్మించాల్సి ఉంటుంది. ఈ దశలో ముందుగా పూర్తి చేసిన ముగ్గురు తదుపరి దశకు అర్హత సాధించారు.మొదటి దశలో అమన్, రామ్ ప్రసాద్, ఝాన్సీ విజయం సాధించారు. వీరిలో అమన్, ఝాన్సీ తదుపరి దశకు వెళ్లారు. రెండో దశలో తాడుపై బంతులను కదిలించే టాస్క్‌ను నిర్వహించారు. అందులో అమన్, ఝాన్సీ ముందంజలో నిలిచి చివరి దశకు చేరుకున్నారు.
చివరి దశలో బిగ్‌బాస్ ఇచ్చిన ముక్కలతో ‘ఐ’ లోగోను ముందుగా పూర్తి చేయాల్సి ఉంది. ఈ దశలో అమన్ విజయం సాధించడంతో అతడే ఆరో వారానికి కెప్టెన్‌గా నిలిచాడు. ఝాన్సీ ఓటమిని తట్టుకోలేక భావోద్వేగానికి గురై ఏడ్చింది. అయితే అమన్ కెప్టెన్సీ గెలిచిన తర్వాత అసలు ట్విస్ట్ మొదలైంది. తనకు ఉన్న మ్యాజికల్ పవర్‌ను ఉపయోగించుకోవడానికి వర్షిణి బిగ్‌బాస్ అనుమతి కోరింది. బిగ్‌బాస్ ఆమెకు అనుమతి ఇవ్వడంతో ప్రత్యేక కీస్‌ను పంపించాడు.
వర్షిణికి ఇచ్చిన మ్యాజిక్ పవర్ ప్రకారం, కెప్టెన్సీ గెలిచిన వ్యక్తి పవర్‌ను తీసుకునే అవకాశం ఆమెకు ఉంది. దీంతో అందరూ ఊహించని విధంగా వర్షిణి.. అమన్ నుంచి కెప్టెన్సీని తీసుకుంది. అమన్‌కు సారీ చెబుతూనే తన నిర్ణయానికి గల కారణాన్ని వివరించింది. వర్షిణి తీసుకున్న నిర్ణయంతో ఇంటి సభ్యులంతా ఒక్కసారిగా షాక్‌కు గురయ్యారు. మరోవైపు ఆరో వారం వరకు మూడు కత్తులు (డాగర్స్) ఉన్న వారికి ఇమ్యూనిటీ లభించే అవకాశం ఉండటంతో ఇంట్లో డాగర్స్ చుట్టూ చర్చ మొదలైంది. ఎవరి దగ్గర ఎన్ని కత్తులు ఉన్నాయో చెప్పాలని బిగ్‌బాస్ ఆదేశించాడు.
ఒక డాగర్ ఉన్నవారు ఇమ్యూనిటీ ఛాలెంజ్‌లో పాల్గొనే అవకాశం పొందగా, రెండు లేదా అంతకంటే ఎక్కువ డాగర్స్ ఉన్నవారికి ఎవరికి ఇమ్యూనిటీ ఇవ్వాలనే విషయంలో నిర్ణయం తీసుకునే అవకాశం ఉంటుందని బిగ్‌బాస్ వెల్లడించాడు. దీంతో కత్తులు లేని సభ్యులు డాగర్స్ ఉన్నవారి దగ్గరకు వెళ్లి తమకు అవకాశం ఇవ్వాలని కోరడం కనిపించింది. ఆ తర్వాత బిగ్‌బాస్ ఇమ్యూనిటీ గేమ్ నిర్వహించాడు. డాగర్స్ ఉన్న సభ్యుల ఫొటోలను ముందుగా ఉంచారు. రెండు లేదా అంతకంటే ఎక్కువ డాగర్స్ ఉన్న సభ్యులు ఎవరికి ఇమ్యూనిటీ ఇవ్వాలనే నిర్ణయం తీసుకునేలా టాస్క్ ఏర్పాటు చేశారు.
ఈ క్రమంలో సృష్టి మొదట వంశీ ఫొటోను తొలగించి తన ఫొటో పెట్టాలని ప్రయత్నించింది. అయితే సుధీర్ వచ్చి వంశీ ఫొటోను మళ్లీ పెట్టడంతో అక్కడ ఆసక్తికర పరిణామం చోటుచేసుకుంది. మరోవైపు ఝాన్సీ, త్రిగున్‌కు ఇమ్యూనిటీ తీసుకోవడం, ఇవ్వడం విషయంలో నిర్ణయం తీసుకుంది. త్రిగున్ కూడా ఆమె నిర్ణయానికి మద్దతు తెలిపాడు. వంశీ తనకు లభించిన అవకాశంతో చరణ్‌కు ఇమ్యూనిటీ ఇచ్చాడు. చివరికి ఆరో వారానికి సుధీర్, వంశీ ఇమ్యూనిటీ సాధించినట్లు బిగ్‌బాస్ ప్రకటించాడు. దీంతో ఒకవైపు అమన్ కెప్టెన్సీ, మరోవైపు వర్షిణి మ్యాజిక్ పవర్, ఇంకోవైపు డాగర్స్‌తో ఇమ్యూనిటీ గేమ్.. ఇలా బిగ్‌బాస్ హౌస్‌లో వరుస ట్విస్టులతో ఎపిసోడ్ సాగింది
