Armaan Malik | రెండోసారి యూరోపియ‌న్ మ్యూజిక్ అవార్డు అందుకున్న అర్మాన్ మాలిక్

2020లో మొద‌టిసారి యూరోపియ‌న్ మ్యూజిక్ అవార్డు గెలిచిన అర్మాన్ మాలిక్‌

బాలీవుడ్ సింగ‌ర్ అర్మాన్ మాలిక్ ప్ర‌తిష్ఠాత్మ‌క యూరోపియ‌న్ మ్యూజిక్ అవార్డ్ (ఇఎంఏ) అందుకున్నాడు. అర్మాన్ ఈ అవార్డు గెల‌వ‌డం ఇది రెండోసారి. ఈ ఏడాది  you (యు) అనే ఇంగ్లీష్ సింగిల్‌కు ఈ అవార్డు వ‌రించింది. 2020లో control (కంట్రోల్) అనే పాట‌కు అర్మాన్ మొద‌టిసారి యూరోపియ‌న్ మ్యూజిక్ అవార్డు గెలిచాడు.

‘రెండోసారి యూరోపియ‌న్ మ్యూజిక్ అవార్డ్ అందుకున్నందుకు చాలా సంతోషంగా ఉంది. యు పాట నాకు ఎంతో ప్ర‌త్యేకం. ఆ పాట‌కు గానూ ప్ర‌పంచ వేదిక మీద అవార్డు తీసుకుంటున్నందుకు ప‌ట్ట‌లేనంత సంతోషం వేస్తోంది. నాకు ఓటు వేసి గెలిపించిన అభిమానులు, ఆత్మీయులంద‌రికీ ఈ సంద‌ర్భంగా కృత‌జ్ఞ‌త‌లు తెలియ‌జేస్తున్నాను. ప్ర‌పంచ‌వ్యాప్తంగా నాపై ఎన‌లేని ప్రేమ, అభిమానం చూపిస్తున్నవాళ్ల‌కు, నా కుటుంబానికి, నా దేశానికి ఈ అవార్డు అంకితం’ అని అర్మాన్ సంతోషంతో చెప్పాడు.

అర్మాన్ మాలిక్ బాలీవుడ్‌లోనే కాకుండా టాలీవుడ్‌లో కూడా హిట్ సాంగ్స్ పాడాడు. హిందీలో వ‌జామ్ తుమ్ హో, బోల్ దో నా జ‌రా, జ‌బ్ త‌క్‌, తెలుగులో బుట్ట బొమ్మ పాట‌ల‌తో పాపుల‌ర్ అయ్యాడు. అంతేకాదు బ్రిట‌న్ గాయ‌కుడు ఎడ్ షీర‌న్‌తో క‌లిసి అర్మాన్‌ ‘2స్టెప్’ స్టూడియో ఆల్బ‌మ్‌ కొత్త వెర్ష‌న్ పాడ‌నున్నాడు.