పెరిగిన విదేశీ మారక నిల్వలు

కొద్ది నెలలుగా అదేపనిగా పడిపోతున్న విదేశీ మారక నిల్వలు ఎట్టకేలకు అక్టోబర్‌ 28తో ముగిసిన వారంలో పెరిగాయి.

న్యూఢిల్లీ, నవంబర్‌ 4: కొద్ది నెలలుగా అదేపనిగా పడిపోతున్న విదేశీ మారక నిల్వలు ఎట్టకేలకు అక్టోబర్‌ 28తో ముగిసిన వారంలో పెరిగాయి. ఏడాది కాలంలో ఎన్నడూ లేనంతంగా ఈ వారంలో 6.56 బిలియన్‌ డాలర్ల మేర పెరిగి 531.08 బిలియన్‌ డాలర్లకు చేరాయి. అంతక్రితం వారం ఇవి 3.85 డాలర్ల క్షీణతతో 524.52 బిలియన్‌ డాలర్లకు తగ్గిన సంగతి తెలిసిందే.

2021 అక్టోబర్‌లో 645 బిలియన్‌ డాలర్ల ఆల్‌టైమ్‌ గరిష్ఠానికి చేరిన తర్వాత విదేశీ మారక నిల్వలు క్రమేపీ తగ్గుముఖం పట్టాయి. అంతర్జాతీయంగా చమురు, ఇతర కమోడిటీ ధరలు భగ్గుమనడంతో ఎక్కువ విదేశీ కరెన్సీని ఖర్చుచేయడం, రూపాయి పతనాన్ని నిరోధించడానికి ఆర్బీఐ డాలర్లు విక్రయించడంతో నిల్వలు తగ్గాయి. శుక్రవారం ఆర్బీఐ విడుదల చేసిన గణాంకాల ప్రకారం తాజాగా ముగిసిన వారంలో విదేశీ కరెన్సీ ఆస్తులు 5.77 బిలియన్‌ డాలర్ల మేర పెరిగి 470.85 బిలియన్‌ డాలర్లకు చేరాయి.