అందం అనగానే ముఖమే గుర్తుకొస్తుంది. మొటిమలు, మచ్చలు ఉంటే చంద్రబింబమైనా అందవిహీనంగా కనిపిస్తుంది. ఈ సమస్యలకు రకరకాల కారణాలు. దిండు కవర్ల అపరిశుభ్రత కూడా వాటిలో ఒకటని నిపుణులు చెబుతారు. నిజానికి, చాలమంది బెడ్షీట్స్ను రెగ్యులర్గా ఉతుకుతుంటారు. కానీ, బెడ్మీది దిండు కవర్లను మాత్రం నిర్లక్ష్యం చేస్తారు. పండుగకో పబ్బానికో తప్ప ఉతకరు. దిండు కవర్లకు వాడే మెటీరియల్ నాణ్యతనూ పట్టించుకోరు. ఒకే దిండును అవసరాన్నిబట్టి కుటుంబమంతా వాడుతుంటారు. దీంతో అంటురోగాలు విస్తరిస్తాయి. చుండ్రుకూడా వ్యాపిస్తుంది. చుండ్రు ముఖానికి తగిలినప్పుడు మొటిమల వంటి చర్మసమస్యలూ మొదలవుతాయి. అందువల్ల బెడ్షీట్స్తోపాటు దిండు కవర్లను కూడా రెండ్రోజులకోసారి యాంటీ సెప్టిక్ సొల్యూషన్తో శుభ్రం చేయాలి. సాధ్యమైనంత వరకూ కాటన్ కవర్లనే ఎంచుకోవాలి. సింథటిక్ ఫైబర్ పదార్థాలవల్ల అలర్జీలు త్వరగా వ్యాపిస్తాయి. ఇంట్లో ఆస్తమా పేషెంట్లు ఉన్నప్పుడు వాళ్లకు వేరుగా దిండ్లు ఉండాలి. దిండును కవర్లు లేకుండా వాడొద్దు.