పెండ్లయిన మహిళకు పుట్టింటిపై హక్కులు ఉంటాయా? అన్నదమ్ములతో సమానంగా ఆ ఇంట్లో ఉండవచ్చా? ఒకవేళ, ఆ ఇల్లు తండ్రి పేరు మీద ఉంటే, పెండ్లయిన అన్నదమ్ములతో కలిసి నివసించవచ్చా? తల్లి, అన్నదమ్ములు, వదినామరదళ్లు వద్దంటే ఆ ఆడబిడ్డ పరిస్థితి ఏమిటి? సరిగ్గా ఇలాంటి సమస్యనే నేను ఎదుర్కొంటున్నాను. పరిష్కారం చెప్పగలరు.
– ఓ సోదరి
పెండ్లయిన ఆడపిల్ల పుట్టింట్లో ఉండొచ్చని కానీ, ఉండకూడదని కానీ చెప్పే ఎలాంటి ప్రత్యేక చట్టమూ మనకు లేదు. అయితే, కన్నవారి ఇంట్లో ఉండేందుకు అమ్మాయికైనా, అబ్బాయికైనా సమాన హక్కులు ఉంటాయి. తల్లిదండ్రులు ప్రత్యేకించి వీలునామా రాసినప్పుడు మినహా, మిగతా సందర్భాల్లో హిందువుగా పుట్టిన కూతురికైనా, కొడుకుకైనా చట్ట ప్రకారం సమాన హక్కులు లభిస్తాయి. ఒకవేళ పెద్దవాళ్లు వీలునామా రాస్తే మాత్రం, ఆస్తిపాస్తులు ఆ ప్రకారంగానే చెందుతాయి. మీరు పుట్టింట్లోనే ఉంటున్నప్పుడు ఇంట్లో నుంచి వెళ్లిపొమ్మని వేధిస్తున్నట్లయితే అది గృహహింస కిందికే వస్తుంది. అయితే, గృహహింస చట్టాన్ని అమలు చేయాలంటే కచ్చితంగా బాధితురాలు అదే ఇంట్లో నివసిస్తూ ఉండాలి.
మానసి చౌదరి
అడ్వకేట్
www.pinklegal.in