ఆయుర్వేదం మనుషులకే పరిమితం కాదు. ప్రతి ప్రాణికీ పనికొస్తుంది. ప్రాచీన గ్రంథాల్లో జంతు చికిత్సా విధానాలు కూడా ఉన్నాయి. అప్పట్లో, శాలిహోత్రుడు జంతు వైద్యంలో సుప్రసిద్ధుడు. కుక్కల ఆరోగ్యానికి సంబంధించి ఆయుర్వేదం కొన్ని చిట్కాలను ప్రస్తావించింది. మనుషుల్లానే కుక్కలు కూడా పరిసరాల్లోని మంచిచెడులను పసిగడతాయి. కొన్నిటికి తీవ్రంగా స్పందిస్తాయి. అలాంటి సందర్భాల్లో వాటికి సాంత్వన కలగడానికి ‘అశ్వగంధ’ ఉపయోగించాలి. మనుషుల కంటే కుక్కల వినికిడి శక్తి చాలా ఎక్కువ. అయితే, కర్ణ కఠోరమైన శబ్దాలు కుక్కల్లో ఉద్రేకానికి కారణం అవుతాయి. ఇలాంటప్పుడు కొన్ని చుక్కల ‘వేపనూనె’ చెవిలో వేసి నెమ్మదిగా రుద్దితే ఉద్రేకం తగ్గుతుంది. జీర్ణ వ్యవస్థ మెరుగుపడటానికి యాంటీ ఆక్సిడెంట్స్ ఎక్కువగా ఉన్న ‘త్రిఫల’ వాడాలి. వీధికుక్కలతో పోలిస్తే పెంపుడు కుక్కలకు చలనం తక్కువ. కాబట్టి వాటి కండరాలు, కీళ్లు సాఫీగా పనిచేయడానికి నువ్వుల నూనె లేదా కొబ్బరినూనెతో పాదాలకు మర్దన చేయాలి.